جراسا -

أنا فتاة مشكلتي لا بزواج و لا حب و لا حتى بخيانة و لا حتى طوشة مع صاحبة
أنا مشكلتي أختي بنت أمي و أبوي لحمي و دمي
كانت البداية إني البنت الكبيرة و هي أختى الأصغر و هيك كنت أنا المسؤولة عن البيت مع أمي و هي ما بتعرف إشي و لا بدها تساعد و لا تتعلم
طول اليوم على تلفونها و مع صاحباتها حكيت عادي كل البنات هيك
بس المشكلة بلشت لما تعرفت على واحد و هي بتوجيهي و أنا بتانيه جامعة و ركبت راسها قال بدها تتزوجو بس تخلص توجيهي
كل أهلنا كانوا ضد الموضوع من الأساس لأنها لساتها صغيرة و فوقها خفيفة و ما بتعرف إشي
بس مشت كلامها بالتهديد و بالمجاكرة و مرة بدها تهرب معو و مرة بدها تقتل حالها
زوجناها غصبا عنا حتى الفرحه ما فرحنا متل العالم
و بعد زواجها بفترة صارت تغار بطريقة مريضة على زوجها و تحكي بوجهي إني بدي أخطفو منها !!
و كل زيارة تعمل طوشة و تحكي كلام مريض عني و وصلت تفتش تليفوني و تليفون زوجها
على أساس تكمشنا نحكي مع بعض و أنا زوجها ما شفتو إلا كام مرة و أساسا من لما صارت تحكي هالتخبيصات صرت أتحاشاه و ما أطلع حتى أسلم عليه
و الله نشف ريقي و ارتفع ضغط أمي و أبوي و هم يحكولها إنتي مريضة و أختك بريئة من بلاكي و جنونك
و بالعكس زادت المشاكل و صارت تحكي و تشكي للناس و تتهمني بزوجها و هون أبوي وقفلها
و قالها زواج و زوجتك مع أنو غصيبة و وصلتك لبيت زوجك اللي كنتي منكده عيشتنا عليه
و مشيتي كلامك و فرضتي رأيك أما تتهمي بنتي بشرفها و توطي راسي بين الناس فهاد اللي مستحيل أسكت عليه
و قالها لا عاد تجي عندنا و هون هي قللت أدبها مع أبوي و حكت كلام وقح و مسبات
و أبوي ضربها و روحت لبيتها و حكت كلام على لسان أبوي كلو كذب على حماها و حماتها و بنات حماها
و إنو ابوي جاي بعرضهم و هيك و حماها إتصل و طاوش أبوي و هدد يشتكي عليه و سمعو كلام وسخ
أبوي حاول يدافع عن حالو بس ما خلاه و بعدها زوجها إجا عندنا و طاوش أبوي كمان و سب عليه
المهم أبوي حلف يمين طلاق إنو أختي هاي ما تدخل بيتنا طول ماهو عايش
و هلا المشكلة صارلها سنة و شوي نفسيتنا بالأرض و أمي دايما تعيط و أبوي صار معو سكري و ضغط
من ورا عمايلها و الأدهى إنها كل ما حدا يفكر يطلبني بتوصلو هي و بيت حماها و بيحكوا بشرفي
و خلت سيرتي على كل لسان و الناس مصدقتها لأنها محسوبة علي أخت
و الله أنا بحياتي ما قربت و لا فكرت باللي هي تفكر فيه و لا عملت إشي فيو تجاوز لحدود الله
بس إيش أساوي دمرتني بمرضها و أنانيتها و مرضت أبوي و عذبت أمي شو اعمل ساعدوني