_كيف علاقتك مع فلان ؟
*فلان آدمي .
_كيف يعني ؟
*يعني حد محافظ على آدميتة بكل معنى الكلمة فيه من كل شي شي .
_ما فهمت، يعني منيح ؟
*منيح ومش منيح .
_حزيره هاي ؟
*لا يا رجل لا حزيرة ولا شي ، قصدي أقلك انه هالشخص بمتوسط حال البنى آدم لا هو منيح زيادة ولا عاطل زيادة .

_طيب شو رأيك بعلان ؟
*هذا إنسان بصراحة ربنا يكثر أمثاله .
_اها، يعني وضح تاشوف .
*يعني هذا بني آدم بتمتع بإنسانية والإنسانية بوجهة نظري مثل وقيم وضوابط اخلاقية وسلوكية بس الله وكيلك هالمرتبه شكلها متقدمة كثير قلال اللي يوصلوا إلها .
_والله أنت عندك تصنيف لازم نعرضه على جماعة علم النفس والأجتماع .
_ بتوقع الكل بعرف هالتصنيف بشكل أو بآخر بس انت اللي مستجد الظاهر .

_طيب صحيح شو رايك بعلاك اللبان ؟
*أعوذ بالله هذا خارج إطار الآدمية إطلاقا ، فكنا منه ربنا يحصيه عددا .
_أهااا، بديت أفهمك وأفهم تصنيفك عموما بخاطرك يا أنسان .

حوارية بالمحكية 18/7/2017