جراسا -

انا بنت عمري 20
تعرفت قبل 4 سنين ع بنت بالمدرسة و كانت جديدة ع المدرسة و ما معها حد رحت انا و صاحباتي و حكينا معها و تعرفنا و يوم بعد يوم زادت صحبتنا لدرجة صرت اهمل صاحباتي القديمات و اضل معها ع طول
لما تعمقنا بالعلاقة اكتر صارت ع طول تشكي و تبكي و انه هي حزينة و اهلها ما بعاملوها منيح و ما بيصرفوا عليها و انا بصفتي صاحبيتها الوحيدة ازعل ع زعلها و اتضايق و هيك
اروح ع الدار احكي لامي هيك هيك صاحبيتي و امي تزعل ع زعلي انا كمان و تزود مصروفي و اعطيها و اشتريلها و اعمل ساندويشات الي و الها والله لما اشتري بلوزة او اي اشي اشتريلها زيي
مرت ايام و ايام و بصراحة وضع اهلي انا كمان ع القد ففكرنا نعمل مشروع او اشي نجيب من وراه فلوس
صارت تيجي عنا ع البيت و نشتغل بالتطريز و بشغلات خفيفة و نبيعهم
كانت تروح هي ع البيوت و تبيع صح كانت مبالغ صغيرة بس ع الاقل نمشي امورنا و مرات توخد اكتر مني و والله مرات ما اخد بالمرة و احكي عادي هاي صاحبيتي
بعد فترة صارت تقترح علي نجمع فلوس بس بطرق مش منيحة انه نضحك ع الناس و من هالقصص، عملت حساب وهمي و ضافت شباب و صارت تشرح وضعها و صدقاً شعبنا يا طيب زيادة يا اهبل مع احترامي و صارت تلتقي معهم و توخد الفلوس و ترجع بصراحة كنت مراهقة و بالنسبة لمبالغ كبيرة يعني فرصة بتجنن
مرة دخلت الحساب و اكتشفت انها بتوخد اكتر بكتير من المبلغ الي بتحكيلي عنه و بلشت تدخل بالحرام عشان تقبض فلوس انا عارضتها و بشدة و زعلت منها فترة و قاطعتها لأنه اول مرة بتمر علي وحدة عدم المؤاخذة بتبيع شرفها عشان اكم دينار
بعد ما بطلنا نحكي بأسبوعين اجت علي بتعيط والله ما بعيدها بس خلينا نرجع زي زمان مشان الله و ابصر شو
بصراحة ما قدرت اقاوم و اقلها لا
رجعت امورنا زي اول و وصلنا التوجيهي
حكينا هالسنة بدنا ندرس بعدين بنرجع نعمل الشغلات الخفيفة ع ايدينا
ع اول التوجيهي رحلت و
اهلي اخدو مني تلفوني عشان التوجيهي و بطلت اتواصل معها نهائياً
نجحت الحمدلله و ما ضل طريق عشان اقدر اوصللها و ما قدرت
مرت اول 5 اشهر بالجامعة و انا تقريباً ما بحكي مع حد و مشتاقيتلها و بفكر فيها و نفسي اشوفها
بيوم خلصنا الدوام بدري و الدكتور كان مش مداوم و ما ورانا اشي
اتفقوا بنات الدفعة يطلعوا يطشوا بصراحة كنت زهقانة و قلت بطلع معهم
طلنا ع كوفي بعمان و هون الصدمة
شفتها مع شب بس متغيرة كتير كتير
نحفانة و مكياج و لبس ع قد الجسم
بالأول شكيت انها هي بس تأكدت من الشامة الي ع جبينها هههه
رحت و ناديت عليها هي انصدمت قعدت شوية مبحلقة فيي بعدين سلمت و قعدنا و انا مبسوطة انه شفتها و بسألها وين اختفيتي حكتلي تعالي نحكي بالتفاصيل اكتر و هاد خطيبي بوصلنا
ركبنا بالسيارة الفخمة و رحنا على عمارة فخمة كمان و طلعنا ع شقة ولا حد حكى اشي و بصراحة كنت خايفة شوي بعدين حكيت انها ما رح تأذيني
المهم
دخلنا و قعدنا و قعد الشب جنبها بتقلي بدي اعترفلك بقلها تفضلي بتقلي انا ما كنت فقيرة و وضعنا كان منيح بس ما بعرف شو صارلي و كنت حابة الفلوس انا انصدمت ولا قدرت احكي ولا الشب بقلي انا كنت بعرفها من زمان و الفلوس الي كنتي تتعبي عشانهم كانت تعطيني إياهم و اصرفهم ع الدخان و صارت تحكيلي شو عملت فيي و انا زي الهبلة كنت و همه بيضحكو بطريقة خبيثة و اجيت ما انجلط انا
سحبت حالي و روحت و بيني وبين الجلطة شحطة
قعدت فترة ما احكي مع حدا و مصدومة من الاشي الي عرفته و كتير تضايقت انه كيف هيك انضحك علي
هسا قررت انتقم
و عرفت انه اهلهم بعرفوا عنهم و بدهم يخطبوا و انا بديش يتهنوا و بدي اخرب بينهم و ابعدهم عن بعض
بدي انتقم منهم الاتنين
بدي اقلب حياتهم جهنم
اعطوني قصص و شغلات اخليهم يموتوا من قهرهم و ابعدهم عن بعض
و عادي الي بدها ببعتلها و بنحكي فش مشكلة
و الي بحكي عني حقيرة او ابصر شو بس بدي احكيله يحط حاله محلي
و رجاءً ما حد يحكيلي انسي و ما تحطيهم ببالك و مش عارفة شو
جماعة القصف براحتكوا حبايبي و السلام عليكم'