جراسا -

ابوي توفا وانا عمري 16 سنة ، وتوليت انا مسؤولية البيت ، صرت اشتغل بعد المدرسة عشان اصرف على البيت ، جبت معدل عالي في التوجيهي ، وما اقدرت ادرس التخصص الجامعي الي بدي اياه عشان ما في مصاري ، ودرست التخصص الارخص .

بعد ما تخرجت من الجامعة وجدت انو شهادتي الجامعية ملهاش قيمة وتخصصي مش مطلوب ، وقدامي في ديوان الخدمة عدد كبير من المتقدمين ، فاضطريت اشتغل اي اشي ثاني ، وزي ما بقولوا (سبع صنايع والبخت ضايع ) ما خاليت اشي ما اشتغلت فيه من دهان وبلاط ونجارة وحدادة وبائع متجول وكنترول باص ، يوم بشتغل ويومين قاعد ، وكل الي كنت اجيبه كنت اصرفه على البيت ودراسة اختي الوحيدة .

ومع انو اختي انهت دراستها واتجوزت الى اني ما اقدرت احوش اشي طوال الفترة الماضية ، فالي بشتغل فيه بيروح سداد ديون وقروض ومصروف بيت وغيره وغيراته .

كل صحابي وولاد عمامي وخوالي تجوزوا وخلفوا وصار ولادهم طولهم ، وانا عمري 35 سنة وفش بجيبتي قرش .

تعرفت قبل سنة على بنت ، حبيتها ، وكنت صريح معها من اول يوم ، انو وضعي المادي تحت الصفر ، وهي قالتلي انو الوضع المادي مش مهم بالنسبة الها ، وانها مستعدة تعيش معي ومع امي بنفس البيت بس اتقدملها ، وابوها اكيد راح يوافق ، وفعلا تقدملتها لكن ابوها ما وافق .

تقدملتها مرة ثانية وثالثة واوبها ما وافق ، مش بس هيك ، غصبها تتجوز واحد من عيلتها ، بعد ما اعترفتله بعلاقتنا ، وقالتلوا انها بدها اياني .

مليت من كل حياتي ، مليت من الروتين ، مليت من شغل اليوم والقعدة يومين ، مليت من نظرة الناس ، مليت من كلشي ومش عارف شو اعمل ؟!