جراسا -

متجوزة من 4 سنوات ، جوزي محترم خلوق حنون كريم شهم ، ضايل اقول شهيد في معركة الكرامة بس هو فعلا هيك ، وكنت عايشة مبسوطة .

جوزي راتبه مش كبير ، يعني مثل اغلب الناس الراتب يا دوب بكفينا لآخر الشهر ، ومع هيك هو ما كان مقصر ، لازم كل شهر يعزمني على مطعم ، ويودي الولاد على الالعاب ، وبجيبلي هدية بالغالب باقة وردة صغيرة من 3-4 وردات سعرها اقل من خمس دنانير بحسها اكبر من الدنيا كلها .

مشكلتي بدت من ايام الخطبة ، لما جوزي (خطيبي بهذاك الوقت ) وعدني ننزل شهر عسل على العقبة ، بس تغيرت الخطة لسببين الاول انه مصاريف التجهيز للبيت والعرس كبيرة اكثر مما هو حسب ، والثانية انو رد على نصيحة بتقول انو من الافضل البنت في اول ايام الزواج تكون قريبة من اهلها والناس الي بتعرفهم .

انا في هذيك الفترة كنت مخبرة كل صاحباتي وقريباتي انو راح اطلع على العقبة ، واقاهرهم بالهشي ، وحتى اختى كنت اضل اقلها انو انا رايحة على العقبة وانت جوزك ما وداك شهر عسل ، وزعلت مني ايامها كثير .

صابتني صدمة كبيرة يوم ما بلغني (خطيبي في تلك الفترة ) بانه تغيرت الخطة ، وما بلغت صاحباتي ، بل العكس بعد الزواج حكيتلهم انو انا فعلا رحت على العقبة ، وعملنا شهر عسل وانبسطنا ، وملحت وبهرت العرطة .

بعد هيك جوزي صار الرجل المثالي عند اغلب صاحباتي ، برومانسيته وبتفهمه وعدم معارضته على اي خيار بتخذه وكرمه معي وكل هاي الاشياء ، وصاروا البنات بس يصير معهم مشكلة يسألوني لو جوزك شو كان تصرف ، ومرات كنت اروح اسأله ،وبس اخبرهم ينبهروا من الرد ، واصير اسمع الادعية الله يخليكم لبعض ، نيالك ، ومن هاي الاشياء الي بتبسط اي بنت وبتكبر راسها .

وصاروا البنات يمدحوا بجوزي ، وانا صرت ازيد واعرط من عندي ، يعني مثلا اقولهم انو اليوم جوزي جابلي ورد وهو ما جابلي ، اليوم جوزي طلعني وهو ما طلعني ، ومن هالامور ، والبنات مصدقات كل شي بحكيه .

مصيبتي مش مع البنات ، مصيبتي مع جوزي الي في حياته ما مسك تلفوني وفتش فيه ، وفي يوم كان محتاج يبعث رسالة من تلفوني لانو خلص الرصيد في تلفونه ، وشاف محادثة بيني وبين صاحبتي وبعرط فيها انو احنا كنا الجمعة في رحلة على البحر الميت ، وانبسطنا وعملنا وسوينا ، وبدا يفتش ويشوف شوف كنت ابعث لصحباتي .

هون جوزي انجن ، واعتبر انو عرطي على صاحباتي اهانه اله ، واتهام اله بالتقصير، وانو اكثر شي ممكن يجرح الرجل (من وجهة نظره) انو يحس حاله مقصر في بيته ، وانو هو مش مقصر ، لانه ما في شهر مر عليه وضل في جيبته قرش لآخر الشهر ، ومن يومها تغير علي ، وصار يقلل من الاشياء الحلوة الي كان يعملها ، الى على قلتها كانت اجمل شي في حياتي ، وصرت افتقد الورد والهدايا البسيطة ، ومش عارف كيف اصالحه ، واخليه يرجع لطبيعته الاولى ، ومش عارف كيف بدي اوقف عرط على صاحباتي الي صاروا يعتبروا انو حياتي هي الحياة المثالية .