جراسا - عمري 35 سنة ، متزوج وعندي 3 اولاد ، كان راتبي جيد ، ووضعي مقبول ، ما كنت مقصر مع عيلتي ، ومع زوجتي بالذات ، لا من ناحية الهدايا ولا الطلعات ، والدليل انو كنت اوصل نهاية الشهر وما في بجيبتي تعريفة ، يعني زي بقولوا ، الي بايدي مش الي .

قبل اشهر سكرت الشركة الي كنت اشتغل فيها ، ودورت على شغل وما لقيت ، وهسا بشتغل في اشي مؤقت مش بمجال تخصصي ، بس براتب بيفرق كثير عن راتبي السابق ، لحد ما ربنا ييسرها والاقي شغل جديد .

المشكلة انو صار في كثير مشاكل بيني وبين مرتي ، لاني صرت ادقق شوي على المصروف ، وخفت الهدايا والطلعات كثير ، فصارت تتهمني بالبخل ، واكثر شي مؤلم للرجل انه يحس او يتهم بالتقصير في بيته .

بحاول اقنعها انو انا مش بخيل ، بس راتبي انخفض بشكل كبير ، والتزاماتي كثيرة وبجوز اكبر من راتبي كمان ، ولازم نتأقلم لحد ما ربنا ييسر الامور ، وهي ولا كأنها هون .

كل يوم بتقلي بنت خالتي عملت ، اختك اشترت ، اختي راحت ، وبتضل على الجروبات تفرجينيي صور طشات صابحاتها ، وهذا الشي بدا يوترني ويزعجني .

اخر مشكلة صارت بيناتنا ، انو في حفلة نجاح لبنت خالتها ، وبدها تشتري فستان جيد ، وانا رفضت ، وقلتلها انو عندك اكثر من فستان ما لبستيهم غير مرة وحدة البسي منهم ، او بدلي مع حدا من قريباتك ، وهي انجنت وحردت وراحت عند اهلها .

عمي وحماتي واقفين معي ، بس مش عارف مين بيلعب براسها ، وبتقول انو ما راح ترجعلي غير لما القا شغل جديد .

شو اعمل ، وانا فعلا بدور على شغل ثاني بس مش لاقي .

انا بصراحة لولا ولادي ،ولولا انو عارف انو سبب المشكلة صفة مش فيي ومش طبعتي ، كان طلقتها ، لانو بالنسبة الي اهانة كثير كبيرة انو اتهم بالبخل ،