كيف تصير سياسي أردني في أكَمِّنْ خطوة .. ؟؟


  حاب تصير سياسي أردني عن جد ..؟؟ طبعاً سياسي ما له دخل بالسياسة ولا زفت ؛ بس الكل رح يقول عنك : بطل و فلتة و اللزي منّو ..!!  حاب تتفشخرلك شوية على خلق الله وتصير تردد عبارة : من خلال تجربتي ..أو ..أنا و أعوذ بالله من كلمة أنا ..؟؟ ما بدّي أطوّل عليك ..خذلك هالوصفة إللي تخلّيك سياسي مُر في الأردن ..و رح تصير تطالب بك منظمات المجتمع المدني و العسكري كمان ؟؟:-

بوجهك على أي تجمّع ..حاول تُقعد بأقرب مكان للناس إللي بتحكي ..إنت دورك كالتالي ..كالتالي فقط ...ظلّك أضرب إيد بإيد وقول هاي الجملة أو زيها بصوت مسموع شويّة : يلعن عرض الشغلة أو إللي يصير ظلم و حرام ..!! و كل ما تشوف الجو مناسب ..أضرب كف بكف ..وظلّك قول : الحالة هاي ما ينسكت عليها أبدا..!! رح تلاحظ من كثر ضربك لكف بكف و من كثرة لعلعتك بالجملة إنو العين فتّحتْ عليك شويّة ..وصاروا الناس يتهامسوا : مين هاظ ..؟؟ وناس ثانيين : مين هاد ..؟؟ وناس ثالثين بس تلد عليك وتسكت ..!!

كرِّر هذه العملية أربع خمس مرّات في أربع خمس تجمّعات ..ولا يهمك شو الموضوع إللي بيحكوا فيه ؛ لأنهم عمرهم ما التزموا بعنوان الحكي ؛ دايما يشلفوا ..فإنت شلِّف هالمرّة وكل مرّة و ما عليك ..حتى لو بيحكوا عن الحوامل وأسباب التبوِّل إللاإرادي ظلك إحكي : والله ظلم والله هاي الحالة ما ينسكت عليها ..ومن هذا القبيل وما تنسى ضربة الإيد بإيد ..!!

الآن إلى الخطوة الأهم في حياتك وإللي رح تنصبك سياسي فلتة في الأردن ..فبعد أن أسست حالك جيدا بضرب الكف بالكف ..وبعد أن تهامسوا عليك ..بقي عليك السجن ..يوم يومين ..أو حتى ساعة ساعتين ..المهم لازم ( تتمحكلك ) بشرطي و تعمل معه حركتين ..روح على أي شرطي قدام أي تجمّع واطلب ولعة للسيجارة ..إذا قالك : فش معي ..اصرخ بأعلى صوت وقول : الله أكبر ؛ أنا و شو عملت فيك ..حرام عليك ..لا لا ..مش رايح معك ..أنا بدّي المحامي تبعي ...!! هذا إذا قالك أنا ما أدخن وفش معي قداحة ..أمّا إذا قالك : تفضّل هي الولعة ..ابتسم في وجهه..واصرخ بأعلى الصوت وقول : الله أكبر ؛ أنا شو عملت فيك ..حرام عليك ..لا لا ..مش رايح معك ..أنا بدّي المحامي تبعي ...!! وما تترك الشرطي إلاّ لمّا تتبلى عليه وتخليهم يجرجروك على بيت خالتك ؛ حتى لو كانت أمك وحيدة أمها وأبوها ؛ لازم تروح على بيت خالتك ..!! وهيك ؛ مبروك ..صرت سياسي أردني ..وتقدر تحكي بالشاردة والواردة وبأمور والله ما إنت عارف إيش هيّ ..!!

abo_watan@yahoo.com




تعليقات القراء

القواسمي
شكلك فلست يا ابو نصير
14-11-2008 07:05 PM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات