جراسا -

انا شب ما الي على قصص البنات والحب والعشق والشغلات هاي ، بصلي وبصوم بس ما بقدر احكي عن حالي ملتزم ، ما عندي احلام كثيرة ، همومي بسيطة ومشاكلي بسيطة .

انا الابن الاكبر ، وابوي وامي كانوا مصريين يزجوني على اساس بدهم يفرحوا فيي ، وانا كنت رافض الفكرة لكثير اسباب منها شغلي ودراستي واسباب اخرى ، ومش موضوعنا نطرحها هون .

وفي يوم اجا ابوي بقلي انو صديقو المفضل مبسوط مني كثير وبحبني ، ودايما يمدح فيي ، خصوصا لانه كان يشوفني بتبرع كل اسبوع للجنه صدقات المسجد ، وقالي شو رأيك انه نخطبلك بنته ، فانا وافقت .

باختصار رحنا شفنا البنت ، وانا زي ما قلت بطبعي خجول ومليش على قصص البنات ، حتى اني ما تفرجت بوجه البنت ، ومع هيك قلت لابوي وامي اني موافق على البنت ، لانو ما بدي غير بنت مربية بنت عالم وناس ، ولكن الصدمة انو اهلها رفضوني ، والحجة انو انا شخص ما عندي طموح .

بصراحة رفض هالبنت او اهلها الي سببلي صدمة ، وخلاني اراجع كثير حالي ، ومع هيك قررت ابقى مثل ما انا ، لانو اذا في حدا مش عاجيبته شخصيتي فهي بتعجب ناس كثير .

وبرضو باختصار مرت الايام ، واهلي شافولي بنت صديق ثاني لوالدي ، وكانت هي ثاني بنت بشوفها بعد البنت الي رفضتني ، واتجوزنا وامورنا تمام والحمد لله ، وصار عندي ولدين وعايش حياة طبيعية مستقرة .

زوجتي خلصت دراسة ، وتوظفت في مستشفى حكومي في قسم السجلات الطبية ، مسؤولة عن تحديد المواعيد ، وفي يوم ابوي بقلي انو صديقو الي رفض يزوجني بنتو بحاجة الى عملية مستعجلة ، وبدو مرتي تساعده بتقديم الموعد قدر المستطاع .

بصراحة ،غير اني ضد الواسطة ، بس محتار اساعد هذا الزلمة الي رفض تزوجي بنتو ، وهو اليوم بحاجة لمساعدة من زوجتي ولا ارفض ؟! .