اغلاق

محلات الـ سي دي مافيات تتحكم بسوق الافلام تحت حماية الاجهزة المختصة .. وافقدت الخزينة الملايين وأضرت بسمعة الاردن


جراسا -

خاص- ظاهرة انتشار محلات الـ "سي دي" المخالفة للقوانين العالمية ولحقوق الملكية الفكرية بشكل ملفت للنظر اصبحت تهدد قطاعات اخرى ولها انعكاسات سلبية على الاردن وعلى خزينة الدولة.

ومن السلبيات التي تسجل ضد الاردن باننا من الدول التي تخالف حقوق الملكية لا بل وصل الامر الى وصف الاردن بانها دولة "تمتهن" السرقة.

"السرقة" عنوان عريض أساء لسمعة الاردن دوليا في الصحافة الاجنبية من خلال قيام مافيات بالسيطرة على هذا السوق.

هذه المحلات يقوم عملها اساسا على مخالفة القوانين المعتمدة، وبذات الوقت على أمرين مهمين:

الاول : عدم قيام الاجهزة المراقبة لهذه المحلات من القيام بمهامها لوضع حد لهذه الظاهره .


الثاني : تقليد الافلام عبر نسخها عن النسخ الاصلية بشكل مخالف للقوانين حيث يتم نسخها داخل تلك المحلات بشكل سري.

ويستطيع المتابع ان يرصد انتشار تلك المحلات والتي تتواجد في وسط البلد وفي شارع الشهيد وصفي التل / الجاردنز وفي المناطق الشعبية والبسطات حيث تقوم هذه المحلات بنسخ الافلام التي تكلف شركات الانتاج ملايين الدنانير والتي تباع النسخة الاصلية منها بنحو 200 دولار،  لتباع النسخة المقلدة باقل من نصف دينار .

ومن الاثار السلبية الهادمة لظاهرة نسخ الـ"سي " دي " المقلد، :

1- تهرب واضح من الجمارك، ما يعني فقدان الخزينة لملايين الدنانير.
2- نسخ وتسويق افلام لااخلاقية تهدد قيم المجتمع الاردني المحافظ.
3- شل قطاع السينما، حيث يقوم اصحاب هذه المحلات بنسخ افلام معروضة في السينما بمبلغ نصف دينار للـ "سي  دي" في حين تكلفته على دور السينما يقدر بمبلغ 200 الف دينار، ما يشكل تهديدا قاتلا لذلك القطاع، فعلى سبيل المثال الفيلم العالمي "افاتار" والذي تكلفته بالملايين على شركات الانتاج العالمية ويعرض حاليا على شاشات السينما الاردنية التي قامت بشرائه بمبلغ 200 الف دينار، تجده في المحلات المشار اليها بنصف دينار !!
4- نية بعض شركات الانتاج العالمية وضع الاردن على لائحة السوق السوداء في حقوق الملكية.
5- المبالغ التي ذهبت هباء على خزينة الدولة جراء قيام هذه المحلات بمخالفة القوانين ودون اي ادنى اعتبار للمسائلة القانونية.

اين مراقبة المسؤولين في ادارة البحث الجنائي والجمارك والملكية الفكرية، وما هي الاجراءات المنوي اتخاذها ضد هذه المحلات للحد من توغلها على قانون حقوق الملكية ؟!



تعليقات القراء

حمدي
لمصلحة من يا جراسا تنشروا هكذا اخبار
هل المفرو المافيات التي تبيع السي دي ب33 دينار ان تتربع علا حساب الاف الصغار
وهذا يحدث بكل دول العالم التي تتدعي انها تحمي الملكيه الفكريه
23-01-2010 04:14 PM
صاحب سينما
ارباح محل صغيريبيع سي دي اضعاف اضعاف ما تربحه السينما
23-01-2010 06:29 PM
الى حمدي
والله يا اخ حمدي لا تاخذ الامور على هذا السياق لانه القضية هاي كبيرة وفيها سرقة لجهود الاخرين التي كلفتهم ملايين الدولارات
23-01-2010 06:33 PM
خريويش الطوز كلانا
العالم كلو بنسخ شو يعني ..مهو طول عمرهم الدول الكبرى والعظمة وهم مستعمرين العالم الثالث وشلحوه وخلوه بزلط فخلي المواطن في العالم الثالث يحصل على المعرفة المجانيه والرخيصة يلي حرم منها بسبب الاستعمالر والتبعية لعشرات ومئات السنين ..وين في مواطن بقدر يشتري سيدي ان كان فلم او برنامج ويدفع عشرات ومئات والاف الدولارات بحسبه بسيطه ثمن البرامج والويندوز يلي بتكون على اي جهاز بتفوق بحدها لادنى الفين دينار اعطوني مين بقدر يدفع هيك مبلغ عدا ثمن الجهاز واشتراك الانترنت ..ناهيك عن برامج طلاب الجامعات ووخصوصا البرامج الهندسيه ..في بعض البرامج اسعارها تبدأ من خمس الاف دولار وفي بعشرين الف دولار البرنامج ..
اما بخص نسخ الافلام الاباحيه هذول بتهبلوا ولا غشيمين ..الاباحيه والدعارة موجودة من يوم يومها مهو ...والاباحيه موجوده بشارع والتلتفزيون والقنوات الفضائيه ويلي بده يشوف ...يوقف بشارع وبشوف .
وبدل ثمن تذكرة السينما هالمواطن الكحيان بشتريلو ربعية كاز ...

وخلي هالناس تحضر الافلام وهي قاعدة في بيوتها وهم لازقانين بصوبة الكاز وبفصفصوا بزر وبصنعوا نشامه المستقبل بهدوء ورويه لحتى يطلع انتاج حاصل على الايزو ..
وبنسبه انهم يحطونا على القائمة السودة المتنيلة بستين الف نيلة ما بتفرق معنا لا سودا ولا كاكي ولا كاروهات .
وبنسبة للمبالغ يلي طارت من الخزينة مش مشكلة طار وتبخر كثير كثير ما وقفت على السيديات
والحكومة يلي بتلطم لانو دخلها تخوزق بسبب سيدي ابو النص دينار وكاينه معتمدة على هالايراد بتكون حكومة عيانة ...بدل ما تلطموا على هالايراد وتعملوا منوا قصة روحوا ورجعوا المؤسسات والشركات يلي خصخصتوها وبعتوها ويلي لليوم ما بنعرف وين فلوسهم بتخرت وما ننسى الااضي الاميريه والمجمعات الحكوميه يلي قبل ما تنسكن تم بيعها ..فروحوا ودورولكم على سولافة غير هالسولافه ..
23-01-2010 06:46 PM
منlion7000 الى السيد خريويش الطوز كلانا
فعلا انه انت روعة وبعد كلامك ما في كلام
( صارت السيدهات بدخل على الخزينه ملايين ) ههههههههههههه
23-01-2010 08:04 PM
دودة
عنا بنفق الجامعه السي دي بنيرة
وعند اسلام اي سي دي بتطلبو بتلقااا بدل ما نخبط مشوار لفيرجن ميغا ستورز
23-01-2010 08:10 PM
بلو راي
شكلكو ياجراسا بدكو ترجعونا لخمسين سنة ورا,بكفي غلاء واحتكار النسخ الاصلية لامريك وباسعار تصل الى السحاب ا,بدناش نحكي الله يستر عليكو وعلينا.
23-01-2010 08:24 PM
مغترب مراقب
طفر وقلة كيف ؟؟!! .... خلي هالشعب يتفرج زي باقي خلق الله ... ولا لازم يظل فرجة ؟؟!!
23-01-2010 08:42 PM
دودة
يلا نردح
23-01-2010 08:51 PM
ابو فهمي
الى كاتب المقال , هذا المقال مبالغ جدا فيه. الكلام الي بتحكي فيه صحيح لدول العالم الاول والناس الشبعانة, اما تقولي سي دي ابو الليرة صاير كاسر ظهر خزينة الدولة وشل قطاع السينما وقلبت الموضوع مافيات فهذا الكلام غير موزون اطلاقا,, يا ريت حكيت عن الفساد الاداري والاختلاسات والرواتب الخرافية لموظفين الامانة 6000 دينار وفوق بدل ما نعظم توافه الامور هذا الي بيضيع على الخزينة ملايين الدنانير مش السي دي ابو الليرة, والي بدور على الفساد الاخلاقي ما بدور عليه في (سي دي) في اختراع اسمه ستالايت او انزل على الشارع بتلقاه.
23-01-2010 10:40 PM
ناصر
هذه منتشرة في كل بلاد العالم الثالث , لكن اضحكني موضوع هدر اموال الخزينة ! يا أخي الهدر نحن نعلم كيف تم عبر سنوات بمئات الملايين . وبعيدن مافي محل يبيع افلام اباحية لان هناك فضائيات ومن يبيع هذه السيدهات اصحاب البسطات . حتى بلاد متقدمة عندها بيع غير قانوني
23-01-2010 10:45 PM
wise wolf

أولا لا يوجد تهرب من الضريبة , بل على العكس, هذه العملية تدخل الى خزينة الدولة اضعاف مضاعفة من جمارك و ضريبة مبيعات على ال CD’s الفارغة, فبسعر 30 دينار للفيلم, ما راح ينباع في الأردن أكثر من 20 – 30 نسخة,

ثانيا هذه المحلات تشغل مئات الاردنين و توفر حياة كريمة لهم و لعائلاتهم

ثالثا فيلم AVATAR حقق 1.5 مليار دولار , و كل حفلاته بالسينما بلاردن بتكون 100 % مشغولة

رابعا السينمات المحترمة محصورة فقط في عمان,

أخيرا هذه المحلات مرخصة من الدولة
23-01-2010 10:59 PM
المهندسة س
شكله هذا الخبر مدفوع الاجر لأنه واضح جدا انه موجه لخدمة فئة معينه.
والحديث عن خزينة الدولة وما تسببه هذه المحلات من خسارة لها ليس له اساس من الصحة لأنه غير منقول عن جهة رسمية ولأن الخبر لم يذكر مصدلا هذه المعلومة.
ولمعلوماتكم فقط، صالات السينما في عمان لا تخلو ابدا من متابعي الافلام ، وتحقق كلها دون استثناء ارباح كبيرة جدا وربما كان هذا الخبر ذريعة لهم للتهرب من الرسوم والضرائب المفروضة عليهم.
عدا عن ذلك كل الافلام متوفره على الانترنت و باسعار رمزية جدا أو حتى مجانا

ملاحظة.. اسم الفيلم "افاتار" مش "اناتاد" و انا نزلته من النترنت و حضرته من اكثر من شهر مع العلم انه لا يزال يعرض في السينما الامريكية


>>>>>
24-01-2010 08:51 AM
ابوعلي
هذه المحلات مرخصة
زاذا بدنا نشتري سي دي اصلي من مصدرو اذا ثمنو 20 دينار بصير ينباع ب 100 دينار بعد الجمارك والضرايب والرخص وتوابها بتصير تنباع السي دي ب 100 دينار
ياترى مين ممكن يشتريها الا طبقة معينة من الناس
في قضايا اهم بكتير تهتمو فيها
24-01-2010 12:17 PM
أمير بكلماتي
ول دشرتوا كل الدنيا واجيتوا على هل الخبر , بس ما توقعتة منك يا جراسا , اول شي انتي بتدعي لضياع اموال الخزينة مش المحافظة عليها , لانة الاردن طبعا ما تنتج هاي السيديات لذلك الموال المواطنين الغلبانين بروحوا للمنتجين الحيتان اصحاب مئات الملايين
, وكل الشكر للمهندسة س على كلامها , ابو فهمي , خريويش
25-01-2010 12:01 PM
مستغرب ويا عجبي
اظن انه في شغلات اكثر هي اللي اثرت على سمعتنا الخارجية واللي مش مصدق يراجع اخبار التقارير الدولية اللي صنفتنا بخانة مش كويسة واللي اثرها راح يكون مباشر على المساعدات وبنخاف يكون الحبل على الجرار
اما السيديات المنسوخة والافلام فهي ما تبقى لهذا الشعب الغلبان، وانا شخصيا مش ضد ضبط الموضوع حفاظا على حقوق المؤلف ولكن في مصلحة لازم تغلب على مصلحة اخرى واعني لما يكون مستوى دخل الفرد بيسمح له يشتري البرامج والافلام الاصلية وقتها بتكون العقوبة اما عدا ذلك فتكون هذه المنتجات ميراث مشترك للانسانية وللشعوب الفقيرة تحديدا
26-01-2010 09:31 PM
حرام
حرام ..الفقراء كسروا الدولة ..بالسيدهات ..مديونية وفقر بسبب شراء المواطنين السيدهلا بنصف دينار ...
27-01-2010 03:18 PM
أنا
يا عمي خلي الأفلام تنعرض بالسينما وبس بالسينما و يروحو الناس يحضروها هناك بالبلاد الي مع ناسها مصاري تروح عالسينما..
أما احنا الي السيديات لما نشتريها بنحسب حسابات..لأ يا عمي بدنا نحضر احنا كمان..
27-01-2010 08:29 PM
حسام البطيخي
هذا الموضوع جدير جدآ انه الواحد يهتم فية وخصوصآ يلي بفتشو على محلات السي دي واشكر جراسا كثير الشكر على فتح مثل هيك موضوع ..................................................
27-01-2010 09:56 PM
س
قيموا هالخبر يا جراسا هسه وقفت على سي دي خلي الغلابه تحضر كم فلم
28-01-2010 03:46 AM
صياح
حقوق شو .. انسى ، يعني هسه الافلام الامريكية معتمدة على السوق الاردني ، يعني ما بتصدق هيك كلام ، كل اشي غالي في البلد ، خلي الناس تتفرج على الافلام بتريح راسها ساعتين ، بعدين المحلات هاي مرخصة و بتأخذ منها ضرايب
29-01-2010 01:40 PM
الماجـــدي.......
التقرير وكأنه مدفوع الاجر من قبل اصحاب السينمات واطراف اخرى او ان جراسا وقعت في فخ !!؟ حيث ان كل التبريرات والواقع عار عن الصحة..
10-02-2010 05:31 AM
ابن البلد
الى 4 وفيت وكفيت 0 عفيه
11-02-2010 06:44 PM
لموش
ياشيخ وقفت على سي دي شيلوا هالمقالة لانوا لو كل واحد بدو يحضر فيلم بدو يدفع مبلغ 20 او30 دينار هاي مصيبة وهذا مش موضوع بنتشر
14-02-2010 06:08 PM
غريب
انا متأكد انه اللي كاتب الخبر ما برضى يشتري السي دي 20 دينار او اكثر وبدي اقسم ع ذلك بكون انا وابني بالسوق بده يشتري لعبه سيارات او ماشابه بدك اياني ادفع ى5 دنانير ليش هو انا سارق المساري سرقه والله تعبان فيهم كثيرا يعطونا رواتب كويسه ساعته بنشتري بالسعر اللي بدها اي الحكومه بعدين النسخه الاصليه والتقليد نفس الشي بهالبلد واللي هي بس للحيتان الله اكبر
15-02-2010 12:08 PM
صقر الاردن
خلي الشعب يبيع سيديات احسن من انو يسرق وينهب يكفي الكبار اللي يسرقو من خزينة الدولة وطول نهارهم بالسينمات
15-02-2010 04:25 PM
ابوعلي
بكفي عاد شسلو هالموضوع اللي الو شهر
17-02-2010 02:01 PM
رامي007
يا شباب الو شهر هاذظ الخبر متغيرو ولا ما ظل اخبار
19-02-2010 07:25 PM
قال مافيا قال
B-)
شكراً لتعليق 4 لانك ما قصرت
بس الصحيح يقال انه احنا مع احترام وتقدير أصحاب الفكر والعقول من برامج كلفت أصحابها الكثير ولكن يا أخي واين البرمجيات العربية (الاردنية) وأنا بدي ألف على المحلات محل محل وأبلغ عن النسخ بس ايكون منحمي اللي سرق ونهب خيرات بالدنا لقرون وأرجعنا الى تخلف بعد نهضة لاحت بفترة حكم عربي اسلامي للمنطقة. اذا الراي نحمي خلينا نحمي أنفسنا من أفكارهم ومديلاتهم وسياساتهم اللي ما زالت بتتحكم فينا.
يا جراسا بدل ما تطلقي هالاسم الكبير على المحلات البسيطة اللي يعيش على قوتها المئات من العائلات وتشغل الكثير من الشباب، طالب بتوقيف الافلام الاباحية اللي بتدخل البلد من زمن وبطرق كثير، وأبسط الامور وبدون تنظير ...........
الشركات التي تزود الانترنت تطلب اشتراك 2 دينار لحجب المواقع الاباحية شهريا
يا جراسا أطلبي من هؤلاء حجب هذه المواقع بدون اشتراك وبدون طلب عن الكل مباشرة.
اعرفت مين يمكن ايكون المافيا اللي بسرق المواطنين باجبارهم على الدفع بخدمة لا بد منها للي بدو يشبك انترنت لابناءه وخصوصا صار لا بد منه الان
20-02-2010 08:39 PM
GIRL
لنكن واقعيين كيف وصلت نسخه سي دي او ديفيدي لفيلم عالمي الى هذه المحلات ؟؟؟ اليس عن طريق الانترنت ؟؟؟؟ وكييف وصلت عن طريق الانترنت الا لوجود مواقع تابعه لافراد من هذه الدول التي تدعي الحقوق الفكريه

لننظر للامر بعين واضحه هم من يقومون بانتهاك الحقوق الفكريه ولو كان لديهم رقابه صارمه لما استطاع افراد بلدانهم تسريب نسخ على الانترنت

مع العلم انه المواقع المشهوره عالميا بهذا المجال كلها من دول متحضره ومع الحقوق الفكريه وبنظري كلها ادعائات لانهم هم اساس انتهاك الحقوق لو كانت لديهم كما يقولون خطط صارمه لما تغاضوا عن مواجهة ومكافحه هذه المواقع ومنعها من خلال مراسله شركات الاستضافه الخاصه بها وللعلم انه شركات الاستضافه لهذه المواقع تكون ببلدهم اي ببلد ذو قوانين واضحه وجميع هذه الشركات الخاصه باستضافه المواقع لها بنود وحق باغلاق اي موقع ينتهك الحقوق الفكريه وللاسف لانجد هذه الشركات تغلق سوى المواقع العربيه بحجه انه نحن ببلد يحترم الحقوق وليس كغيرنا من البلدان

للعلم لو لاحظتم هذه الافلام كلها غير واضحه وتاتي من منشا الافلام يعنيي الفيلم المصري التهريب يبدا على النت عن طريق المصريين والامريكان كذلك فكل هذه البلدان ليس لها الحق \باتهام بلدنا فل تنظر لنفسها اولا ثم تنظر للبلدان التي لديها هذه النسخ
وبالنهايه السي دي والديفيدي بوصلنا مو واضح فالواحد بطر ليحضره ويستمتع فيه انه ينتظر نزوله على احدى القنوات او يذهب للسينما لحضوره

كفانا سماعا لاقاويل الغير عنا ولينظر كل واحد لنفسه ..... فبلدانهم هي اساس الانتهاك وهي اساس هذه المافيات



للعلم ... بامريكا سعر النسخه الاصليه للفيلم 15$ فقط وليس كما تقولون 200$
وهي منتشره لديهم باسواقهم وعبر الانترنت للبيع حالما يتم نشره بالسينمات
لكن انتهاك الحقوق ولعدم الرقابات ببلدانهم ولانهم يثقون وثوقا اعمى بشعبهم على انهم شعب متحضر وهو اساس التخلف الفكري بهذا المجال فيشتري احدهم النسخه الاصليه ويبدا ببيعها ونشرها على الانترنت بمبلغ رمزي وعلى الانترنت بدون مبلغ حتى ليشهر مدونته او موقعه

دعونا لا ننشر اكاذيبهم ولا نسمح لهم بذلك
ولا يتلاعبوا بعقولنا اكثر من ذلك فهم من ينتهكون حقوقهم وافكارهم .....

وبالنسبه للبرامج فلا اعتقد انه يوجد شخص اردني يعلم كيف يصنع كراك وسيريال لبرنامج ما ولولا مواقعهم هم لما انتشرت هذه الامور ولما انتهكت حقوق شركات كبيره بمجال البرامج


يكفي تظليم بشعبنا فنححن ملتزمون بهذه الامور اكثر منهم

23-02-2010 01:07 AM
سلوووووووووووووووم
جميع الافلام العالميه المعروضه في السينما موجوده على النت وفي عدة مواقع مجانا يومكن لاي شخص تحميلها دون ان يدفع حتى اقل من نصف دينار وانا شخصيا سحبت فلم افتار من موقع مصري ومتوفر الفلم في عدة مواقع اردنيه خلي الناس تعيش مستوره بدكم الناس تشحد ةتسير تسرق الله يستر من الي جاي
25-02-2010 10:03 AM
ابو عاصم الأردني
تستفيد قطاعات أخرى من رخص أثمان ال سي دي المنسوخة ، حيث يزداد استهلاك الكهرباء نيتجة زيادة ساعات المشاهدة من الشريحة الكبيرة من فقراء ومتوسطي الدخل ، كذلك ، تستفيد شركات بيع اجهزة ال دي في دي والتلفزة وغيرها من الأجهزة واللوزام لتشغيل هذه الأفلام ، كذلك بع القهوة والسجائر والمكسرات التي هي من مستلزمات جلسات المشاهدة ، وتزداد ضرائب الصرف الصحي نيتجة لذك ، وهذا نذر يسير من الفوائد المترتبة على البيع الرخيص للنسخ الرخيصة من ال سي دي وال دي في دي ، وبالتالي فهي تساهم في دعم الإقتصاد الوطني بصورة أ غير مباشرة .
25-02-2010 11:35 AM
أردني و أفتخر
أنا بقول لازم انكون شعب واحد ايد وحده ولا للسيدي الأصلي و نعم للمنسوخ في نص دينار مش حرام نشتري سي دي 33 دينار وله 50 دينار لو انو دخل الفردي للموظف الأردني 2000 دينار ساعتها طبقو هذا القانون مش دخل الموظف 150 دينار و نازلين فيه كام ما يسمع اغاني ولا يحضر افلام و مش عارف شو كمان ارفعو رواتب الموظفين و الدخل و ساعتها قولو ممنوع منقول ماشي و حاضرين و انشاء الله هفتح 10 محلات تسجي سيدي حتى بالدار هسج و ابيع في ربع ليره مين الو عندي ؟؟؟؟؟؟؟ قانون الضريبه اذا انا ما بربح و مو مستغل المواطن ما بطبق علي هذا القانون و بالنسبه لحكم الرخصه و المقايس يا سيدي منغير بدال سيديات على فلاشات و موموري مافي قانون على الموموري و الفلاشات بلاش انتاجر في سيدي يا خواني خلينا انتاجر في الموموري و الفلاشات
05-03-2010 12:52 AM
جهاد حسين
من كل عقلكم بدكم المواطن الأردني يدفع 100 دينار عشان دي في دي أو سي دي ليحضر فيلم متوفر على الإنترنت ببلاش وبوضوح عالي، من المعروف أن الدول الكبرى هي فقط تطبق قوانين الملكية الفكرية
05-03-2010 12:56 AM
م امين البطوش
قوة الصين الاقتصادية بدات من خلال بوابة سرقة الملكية فهي تقلد كل شيىء من الصنلعات الغربية اليوم تنزل القطعة على السوق ثاني يوم تجد الا القطع معبية السوق واسواق العالم الاول الثاني والثالثوما هية خايفة من ان ان تصنف وتوصف بالسرقة لان ازدهار دولتهم ومواطنيهم يعتمد على التقليد ولانهم صادقين مع انفسهم وعارفين شو بدهم نجحو واصبحوا من الدول العضمى بطلو كذب علينا وعلى انفسكم وخلي البلد تنتعش من خلال هذا السوق بعد ان فشلت سياساتكو الاقتصادية وخططكم الخمسية والعشرية واللدليل زيادة المديونية وتفاقمها لعدم قدرتكم على ايجادحلول تنعش الاقتصاد الوطني لان كل واحد فيكم يعمل من خلال منصبة حتىيعبي جيبتة ويزيد ارصدتة ومنتو سائلين عن البلد ولاعن ابناء البلد وحلكم الفاشل لسد العجز في الميزانية وخدمة الدين العام هو مد ايديكم الى جيب المواطن وسرقة قوتة وقوت ابنائة من خلال فرض حزمة من الضرائب وهذا العلاج سيخرب البلد ويهدمها بايديكم يامرتزقة
11-03-2010 05:06 PM
تحيا مافيا السي دي
هدر أموال الخزينة؟؟؟؟ والله ضحكتوني يا جراسا. أي بكفي اللي بتشفطة الدولة من ضرائب و ضرائب على الضرائب . أنا مع مافيا السي دي و الله يوفقهم و يرزقهم كمان و كمان. بالله مين بشتري فيلم باربعين او خمسين دينار و هيو موجود بنص دينار؟ و جكر بالخزينة، اذا سكرو هاي المحلات , رح انزل افلام من الانترنت و انسخها و اوزعها ببلاش، و انجن يلي بتنجن
17-03-2010 03:02 PM
اللحمة بإيد اليتيم عجبه
يعني قضينا على كل السرقات والاختلاسات في البلد وما ظل غير اصحاب السيديات هم الكاسرين البلد.... عجبي يا بلد.!!!!!!!!!
23-06-2010 12:33 PM
حسام العمورى / سينمائي
اولا اود ان اشكر جراسا لطرف موضوع قرصنة وتهريب اقراص ال (سي دي) او ال (دي في دي) في الاسواق الاردنية حيث ان هدة القرصنة تضر بكثير من مصالح الاردن وخاصة ان الاردن من البلدان الاوائل في عملية عرض و توزيع الافلام السينمايئة العربية و الاجنبية خاصة الامريكية , علما بانه يوجد لدينا قانون لحماية الملكية الفكرية ولكن ينقصه التطبيق الفعلي وفرض العقوبات الصارمة بحق مرتكبي مثل هدة الجرائم طبعا بتعاون بعض الجهات الرسمية المعنية بهدا الموضوع مثل المكتبة الوطنية هيئة الاعلام والمرئي والمسموع ودائرة الجماك بالاضافة الى دائرة البحث الجنائي. يجب ان يكون هناك تعاون مشترك وتبادل للمعلومات لحصر هدة القضية الحساسة والتي تضر بسمعة الاردن عربيا ودوليا, فانا اقترح بتشكيل لجنة من دوي الاختصاص وبرئاسة عطوفة مدير المكتبة الوطنية لوضع الية عمل لمراقبة تلك الانتهاكات من قبل هدة المحلات يالاضافة الى تشكيل قسم في مديرية الامن العام تحت اسم شرطة المصنافات واعطائها صلاحيات تنفدية و فورية بحق اي شخص يرتكب مثل هدة الجرائم لانها اولا واخرا اموال الشعب والدولة في نفس الوقت. اود ان اضيف شكري الخاص لدائرة المكتبة الوطنية وهئية الاعلام المرئي و المسموع , لكن نريد الحق لاصحابه.
14-07-2010 09:56 PM
جمال
بسم الله
طب احنا لو جينا نحسبها مع بعض شوي... لنفرض انه تطبقت قوانين الملكية الفكرية على الأفلام و برامج الكمبيوتر و السوفتوير و غيره بطبيعة الحال, رح يضطر اي مواطن عادي عشان يستعمل اي برنامج او يحضر اي فيلم انه يتكلف مبلغ مش بسيط على عموم الناس,, يعني كتير صعب علي انا مثلاً اني اشتري جهاز كمبيوتر مثلاً ب 500 دينار و عشان انزل عليه ويندوز بدي 200 دينار و اوفيس بدي 100 دينار و انتي فايرس بدو 40-50 دينا و برنامجين وللا تلاتة بدهم كمان 300-400 يعني بدي كمان 1000 دينار زيادة على اصل سعر الجهاز ,اي الواحد بكون بايع اللي فوقه و اللي تحته عشان يلحق كمبيوتر ب 300 دينار و لما يجيبو بيعمل عرس, لسه بده يدفع كمان؟؟!!, على هيك لو صارت كل نسخ البرامج و الأفلام اصلية رح يبطل الشعب يشتري و رح تكسد هاي السوق بشكل كتير كبير, و رح ترجع البضاعة لشركاتها و رح يضطرو يعملوا تخفيضات كتير كبيرة ع اسعارها حتى تتصرف في السوق و إلا بيخسروا كل شي,, لو الواحد فكر بهالطريقة بيعرف تماما ليش شركات الانتاج و شركات الالكترونيات و السوفتوير مش عم تسأل فينا شو هكرنا و شو نسخنا و شو لطشنا لإنه ببساطة ما الها مصلحة معنا وشو ما حاولت تتخذ اجراءات او تطالب بحقوقها رح تكون بالآخر خسرااااانة
17-09-2010 02:29 PM
Dubai 59
علي الضمان ان ه كلام خريوش الطوز كلانا عدل ...................
18-12-2010 06:26 PM
أحسن بكثييير
أصلا هالحكي أحسن

مشان مو كل واحد اللهم يشتري جهاز و يحط عليه أكمن فلم و برنامج و خلاص يكون صار عبرقي و خاتم العلم

كل شي و له اللي يستاهله يعني هس ليش ما يعطلو لطالب إبتدائي شهاده جامعه مثلا لإنه ما يستاهلها لسا بعد ما يخلص توجيهي و ينجح و يخلص الجامعه حتى يعطوه الشهاده و نفس الشي الكومبيوتر و السيديات و الأجهزه يعني الواحد لازم يستحق الجهاز و بكذا لو إنه عنجد اللي بده جهاز أو سي دي لازم يدفع يفعني واحد بس هيك جاي يشتري هالبرنامج أو سي دي فيها 50 برنامج ب 1 دينار و هو من الأساس ما يعرف كيف من الأساس يشغلها أو يستخدمها

يعني لو واحد بده لعبه سيارات يشتريها

و أكبر دليل على إن اللي ما يعرف للأجهزه ما لازم يكون عنده جهاز من الأساس

و اللي يقول لل سي دي أشرطه مفكر حاله على الراديو شغال و اللي يقولها سيديهات

فمشان هذي النقطه تكفي و تزيد على إنهم بس يتبعو حقوق الفكر هذي

و اللي كمان يجي يقول ما فرق بين المقلد و الأصلي فهو غلطااان غلطااان كثييييير

و أظن إني كثيت اللي يكفي و أعطيت سببين على هالحكي

21-01-2011 11:40 AM
مواطن
على فكرة الاف الشباب بيشتيغلو بالهشغلة .... اذ بطلوها ارتمو بالشارع يعني بطالة وزعرنة وسرقة رح تسير .
05-04-2011 07:04 PM
صاحب محل سيدي سابقا- ومواطن عادي حاليا!!!!!!!!!!!!!!!!
حرااااااااااااام والله - يعني بيعترضو على السيديات المنسوخة, اسمحولي اعطيكم معلومة , القانون بيحاسب على تقليد النسخ الاصلية, انا معاهم مش غلط حقهم , بس القانون لازم يحاسب لما الفلم المنسوخ اولا يكون بجودة النسخة الاصلية مش الصورة مش واضحة والصوت مش واضح, لو انو الفلم المنسوخ بوضوح الاصلي والله ما بزعل, بيحاسبو على اشي مش منطقي...
ومن ناحية الالعاب والبرامج ما الموجود بالسوق كله نسخ تجريبية ومشان هيك تطلب كراك وطرق اخرى لتشغيلهم وقسم كبير من الالعاب مش كاملة, بدي افهم هيك بيكون تقليد عن الاصلي, والا دعاية للشركات الكبرى والسينمات , اللي بدو لعبة كاملة وتقبل دعم الشركة يروح يشتري نسخة اصلة, واللي بدي يحضر فلم واضح وتقنيات الصوت عالية يروح على السينما او يشتريه اصلية..... القانون بيحاسب اذا كانت النسخة اامقلدة تشبه النسخة الاصلية , وين والشبه وين,اي هو الفلم المنسوخ فلم ينحضر حتى يحاسبو عليه....
كمان اللي قاعد بيصير من بيعهم هو دعاية للشركات الكبرى لويش هم زعلانين , ان كان المقلد في السوق والا على الانترنت,هو دعاية الهم والللي بدو يشتريه أصلي يشترية .

وبالنسبه لدخل الدولة - اولا بيحطو ضرائب على السيدي الفارغ و ورق الطباعة و اكياس السيديات وكمان اجهزة الكمبيوتر اللي بتنسخ كل هاد ما مردود مالي للدولة
كمان اذا اصحاب المحلات اشتغلت مش بيكون في تحسن في الاقتصاد مهو صاحب المحل من الغلة بدو يشتري خبز وخضرة وفواكه وغيره من السوق - وهيك ما بيتحرك المال بالسوق وكل الناس بتشتغل بسبب دورة المال في السوق ما بيحصل ركود تجاري.
وكمان المواطن بيوفر من حق النسخة وبنفس الطريقة بيصرف المال بالبلد على امور المعيشة ليش يشتريه اصلي والمال يروح للخارج .. اتوقع انه الافضل

وعلى فكرة كان عندي محل من 3 سنوات واجت المكتبة الوطنية صادرت نص المحل واتحملت قضية وحكم 3 اشهر وتم استبدال الحكم - وهاد مش ايراد للدولة كمان
الحمدلله اني تركت هالشغلة هي اصلا مش موفية والله ما كان في ايراد الشغل ضعيف - وبيقلك تأثرت السينمات من محلات السيدي
والمضحك انه من خلال انتشار الانترنت في البيوت حاليا لا محلات السيدي ولا السينمات ولا مقاهي الانترنت بتشتغل كاها مكسورة وراح تسكر بدون ما تتدخل الدولة بمحاسبتهم قانونيا, لحالها خربانة......
والباقي عندكم
30-05-2011 12:34 PM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات