أبو المفاهيم : ممكن سؤال مُزعج ؟؟

ساعاتي: تفضّل ..بس ..يكون مُزعج عن جَدْ

أبو المفاهيم: ليش الناس في الأُردن ما بيناموا إلاّ أربع ساعات في اليوم ..؟؟

ساعاتي: والله هاظا السؤال ما خَطَر عَ بالي ..فعلاً ليش ..؟؟

أبو المفاهيم: وَلَك أنا إللي بسأل ..

ساعاتي: يمكن عشان يشتغلوا أوفرتايم ..؟؟

أبو المفاهيم: وَلَكْ أصلاً هُمّا لاقيين شُغل عشان يْفَرْتو..ماهُم قاعدين

ساعاتي: قصدي أوفرتايم بالقعدة ..،،

أبو المفاهيم: بلا تخويث ..لأ مًشْ هاظا السبب

ساعاتي: يمكن عشان بحبّوا يتفرّجوا عَ السما والنجوم والقمر..؟؟

أبو المفاهيم: ماهُم عدّوا النجوم بعزّ الظهر ..،،

ساعاتي: يمكن عشان كل يوم بيستنّوا بضيوف ..والضيوف لسّة ما أجوا ..؟؟

أبو المفاهيم: وَلَكْ ..هو ظل حدا يستنّى بضيف ..لأ ما حزرت ..،،

ساعاتي: يمكن النوم الصحّي بس أربع ساعات ..عشان هيك يناموا بالمُفيد ؟؟

أبو المفاهيم: وَلَك الصحّي ثَمن ساعات ..

ساعاتي: طيّب يمكن عشان عندهم مرض الأرق وقلّة النوم ..؟؟

أبو المفاهيم: لا هُمّا صاغ سليم ..ما يشتكوا إلاّ من مرض اسمو ( اعرف مع مين بتحكي ) ..،،

ساعاتي: أيْ حيّرتني معك ..مًشان الله قولّي ليش بناموش إلاّ أربع ساعات في اليوم ..؟؟

أبو المفاهيم: وَلَك يا حمار ..عشان فًشْ عندهم إلاّ أربع ساعات ..لو كان عندهم ساعات أكثر بناموا أكثر..،،

 

abo_watan@yahoo.com