اغلاق

وصّوف, فنّك فنّ والا عنّ عنّ؟


اولا انا بعتذر من كل فنان خلوق (عربي اصيل ولا افرنجي ودخيل, شرقي غربي, فوق النهر وتحت النهر), بس انا ما بعنيني الفن السوري خصوصا الهابط ولا اللبناني خصوصا المايع ولا اللي تأردن وصار اردني مشان يصوتولوا الاردنيين (من شتى المنابت والاصول), الاردنيين الكبير والزغير حتى المقمّط في السرير كلهم حشدوا وتحشدوا علشان يصوتوا لوحده هبطت فجأة من غير إحم ولا دستور وصار اللي صار, يومن غنت (راسك بالعالي مرفوع الهامة انت اردني اهل الكرامة) وبلشت تعزف وتغزل على هالوتر التلفان الملتعن ابوه, وتر هالوطنية اللي صارت مثل مزامير التلمود عند (اعيال عمنا في يهوذا والسامرة).
طيب منتي اردنية تحت بند النفقات والوطن منشغل فيكي في الرصيد المدور, وعلى الحساب صوتلك صاحب الجلالة وصاحبة الجلالة وكل الاردنيين صوتولك لاجل خاطرهم يومن قالوا وين النشامى هبة الريح؟ اعتبرناكي سفيرتنا في معمعة الفن, طلعتي حصان طروادة اللي تسللوا منوا اهل الخساسة والعنّ عنّ مثل الماتور المكشنت, مهو معلش (الله يطرح للمغلوب البركة), لانه احنا ناس كتلة من الاخلاق والاحساس حتى لو بتنا على الحصيرة واكلنا قلية ورشوف وعصيدة, طيب شو اللي جرى يا كرزونة انتي وخيتكي المزيونة؟ ساق الله على ايام ميسون الصناع وتوفيق النمري وعبده موسى وجمال اخليف الاغوات!!, يا حسرتي على ايام وصفي التل يومن استدعى توفيق النمري وقاله ( ليش بتقول ألبي يهواها؟ قول قلبي يهواها (بالقاف المجلجة الظمأى الناشفة) لترسيخ اللهجة الاردنية في الموروث الجمعي للشعوب, وينك يا اعلامنا الفارط؟ وينك يا اعلامي يا اخوث؟ وينك يا اعلامي يا متسلق يا مدعي الاناقة واللطف والكياسة على حساب كل الاشياء واعز الاشياء؟ متنتفظ متخلي جبينك يعرق على هيبة اهلك وبلدك؟ منت بتوخذ راتب وشغلتك تدافع عن الوطن من ورا منبرك.
انا صحيح ما الي في هالدربكة اللي بقولوا عنها اليوم عنّ عنّ والا ( vun vun ) (مع اعتذاري من الفن واهل الفن) مهو اللي بتقدموه مش فن اصلا, بس احنا شعب اردني محترم عودونا كبارنا اللي تحت التراب قالوا يبه (يعني يابا) اذا شفت صاحبك مفحج وراكبله قصيبة ومصهلل قول اله مبروك عليك هالفرس, يعني لا تحبطه وشد من عزايمه خليه يصدق انه بني آدم عنجد وفارس ما ينلحقله حد.
انا والله ما الي لا بالجعير ولا بالنهيق ولا بالتعويص ولا بكل اللي بقولو عنه فن اليوم, بس انا بحاول اتصفح اخبار ديرتي يوميا وصار اللي صار يومن علمت عن هالاجرب المجذوم الموتور اللي والله اني مستغرب ومنجن من هالجمهور العريض حوله واللي بقهرني اكثر السحيجة وراه واللي ذايبين في صوته (الاجش) المخشن, صوته يا جماعة بذكرني بشغلات قديمة ايام الطيش والولدنة اعذروني لاني مضطر احكيها حتى تتوضح الصورة اكثر, يومن كنا عيال زغار نلعب في الحارات طول النهار, كان الواحد منا لما ينحشر وبدو يبوّل, ينزل مع سفح الوادي مشان يبول, تصدف احيانا انو في قطعة من جلد ماعز مرمية من زمان مدفونة بشوية تراب وناشفة, يومن يتساقط عليها البول يصدر عنها صوت خشيش وترترة وخنخنة مثل صوت الاخنب, هذا الصوت برجع وبتذكره وبدون مبالغة ولا افتراء كل ما سمعت بالصدفة صوت هالمعتوه وهو بغني, هو مين اللي طبلّه وزمرلّه لحد ما صار يفكر حاله مطرب, مهو قلة الذوق وقلة المعرفة بالفن المزبوط هيك بتسوي, انا عن جد بحسد الاطرم والاعمى على نعمة الطرم والعمى اليوم لانهم مرتاحين من سماع وشوفة هيك نشاز (وصوف والا اللي بطبل معاه وبضربله ع الدفوف), مهو يا ديانا ( يا نقو عين الاردنيين) احنا عارفين البير وغطاه وبلاش فصاحة انت وخيتكي الله يخليكو لبعض ويخليكي للي صوتولكي كمان, مهو انت ما صرتي فنانة هيك, انت صرتي فنانة لانه احنا بدنا اياكي تتفنني علينا وعلى غيرنا, يعني صرتي فنانة بقرار سياسي, اليوم جاييه ذايبة في دباديب هالمعتوه صديق السفاح ابن تيمورلنك, يا بنت الحلال خلي خيتكي (تصغير اختكي للتحبب مش لاشي ثاني) بقول خلي خيتكي توخذ عن راسها شوية, يمّ!! هيك!! على طول الهيام والوله والحب والطيشان على شبر ميه عشان واحد كوّش ع النذالة من كل اطرافها وما خلى اشي للانذال الزغار يسووه من بعده!!!
شو بدي احكي؟ ولمين افضفض واشكي؟ يعني من فوقك ناس ما بتسمع واذا سمعت ما بتفهم عليك وبقولوا ماله هستر وانجن؟ ومن تحتك ناس دايخة ومش صاحية ومن حولك الله يستر ناس بدها كلمة عليك, الشماته طبعهم والنميمة متاصلة فيهم, كله لانك اردني, طيب الاردني شو عمل الكو غير انه طبطب عليكو حتى كبرتو وصرتو على المسارح تثغثغوا؟ الاردني يا اللي ما بتعرفه بقدر يميز الاصوات القبيحة من الجميلة بقدر يميز السلالم الموسيقية الموزونة واللي مش مصدق يقرأ ويسمع قصيد العوام الاردنيين والشعر النبطي ولحن الربابة وجمال اتساقه اللي ما حدا يقدر يقحمه من عربان هالامة كلها, بس الاردني مثل قيادته مشكلتهم الوحيدة في اخلاقهم, الاردني بقول يا ولد خليها في قلبك تسطح ولا تطلع في وجه صاحبك وتجرح, الاردني من فوق لتحت كله زي بعضه بحاولو يصنعوا من القُصّيب المخوّخ ارماح بس والله كله فشك فاظي, ويا خسارة التعب!!, بنقول يا جماعة خليهم معانا, يمكن يكون فيهم بذرة خير وكل مرة بطلع الرهان على جواد خاسر والكيس حتى لو انو مليان بطلع كله فستق منخور وبطيخ امّذّر وفاظي.
قميص وصوف اللي ما لقيناله في قاموس الفضايل وصوف لبسته الكرزونة الهنوف اللي جملت حالها بشوية كليمات (تصغير كلمات) اردنية, صار الاردني يفكر انها سفيرتنا في بلاد الواق واق, مش هيك بدّو القرار السياسي والسيادي؟ والنعم والنعمتين في كل القرارات السيادية والسياسية حتى لو مش مقتنعين فيها بس احنا كلنا سمعا وطاعة لعيون القرارات السياسية والسيادية, احنا الاردنيين بنعرفها وبنحرفها يعني هيك تربينا, بنحرف الكلمة الخايبة ونوخذها على محمل الطيب ونحولها صايبة, بس لمتى يا جماعة؟
وصوف اللي قاعد بثغي مثل الخروف صار معروفنا معه ومع اشكاله متلوف.
وصوف المسفلس بجرش مثل طاحونة ابو مرعي الخربانة صار فنان ما اله وصوف.
وصوف يا جماعة يا اهل النخوة والحمية شخص مهتوف (معتوه) ليش تخلوه يدخل هالبلد الماكول المنتوف؟
وللحيزبون وللي يحوشي حول الحيزبون نقول:
بدها شوية حيا والا تراكو بلحظة تسقطوا من عيون الاردنيين مثل ما يتساقط بعر حلالنا وجمالنا, يعني بلا هيبة وبلا حشمة, واللي يطبل منكو لوصوف نديم السفاح وابن خاله مخلوف اسمع وان ما سمعت تراك بالزربول تشوف.
shawabkehtaha@yahoo.com



تعليقات القراء

العميد المتقاعد محمد فتحي عياصره
احسنت طه بيك ، تعابير ومفردات مقالتك تليق بهذه الحثالات التي لمجرد نظرة واحدة لهم تدرك انك تنظر الى شخص هبيلة او معتوه يتنقل بين الشوارع والازقة من غير هدى
27-09-2015 04:04 PM
طه الشوابكه
أشكرك أستاذي الكبير وما قرأته عطوفتك إلا غيض من فيض فكركم النير للرد على الأوباش
27-09-2015 10:24 PM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات