جراسا -

بدي اطرح مشكلتي بلكي حدا سياعدني في طريقة اتفاهم فيها مع جوزي، احنا الاثنين بنشتغل من الصبح للساعة خمسة ولكن انا لازم اجيب بناتي من المدرسة والحضانة فبتأخر اكتر من جوزي وبوصل عالبيت مستوية لانو طبيعة شغلي طول النهار واقفة وجوزي بشتغل في مكتب وشغلو عالكمبيوتر ومن ساعة ما بوصل عالبيت بدخل على غرفته وبقعد عالكمبيوتر طول الليل وما بحكي معي غير بدي اتغدى وبدي اتعشى وهاتي قهوة وهاتي شاي ومرات بجيب صحابو معو وبضلوا لنص الليل قهوة وشاي وشدة وصياح على بعض ومسبات.

طبعا انا علي كل شغل البيت وبشتري الاغراض وبدفع الفواتير ومرات بيعطيني مصاري ومرات لا،،،. واذا كان في اشي خربان في البيت بدو تصليح وبحكيلو يصلحو او يجيب حدا يصلحو بحكيلي اتصل باخوي الكبير لانه عندو محل صيانه عامه ،،،. يعني لا بعرف يصلح اشي ولا بساعد بشغل البيت ولا بودي البنات على المدرسة ولا بجيبهم ولا بعرف يشتري اغراض للبيت ولا بعرف يشتري اواعي لنفسه ولا بعرف يكوي ولا بعرف يلمع كندرته بعرف يصيح بس، ومرة حكيتلو نزل البرادي مشان اغسلهم رحنا ما نتطلق،، وانا راضيه اعمل كل اشي مشان ما يحكي عني لخواتو وامو ويكرهوني
شو اعمل معو وكيف بدي اخليه يتحرك ويساعد شوي وانا عارفه انو بدكم تضحكو علي ولكن عندي البنات اغلى اشي بحياتي ومو مستعدة اخليهم يتعزبو او يشعرو انو ابوهم مش كويس شو اعمل والله تعبت