حكوماتنا مظلومه


بدي احكي والحكي ماعليه جمرك.. بدي اصرخ واعلي صوتي بدي حكوماتنا تسمع يسمعو ا والوضع يقشعوا وخلوني اقول الحقيقةللناس لكل الناس النايمه واللي ماصحي يصحى حكوماتنا ... مظلومة .... مظلومه..... والشعب ابن ستين ... و ناكر للجميل
بعرف ان هذا الحكي راح يرضي الكثير ومنهم بهالحكي كانك بتحك له على جربه... شو يعني شعب... وشو يعني حكومة... وشو يعني قوانين وانتخابات واسعار وبنزين وكاز وغاز واراضي وتصدير واستيراد شو يعني يطردوا مستاجر من سكنه ولاويقطعوا الكهربا شو يعني؟؟؟؟؟
بقولوا الشعب بده ديمقراطية طيب هو بالاصل بعرف شو يعني ديمقراطيه لعبه بطارياتها خالصة مابعرف يشغلها ... وشوهي الديمقراطية و ليش الديمقراطية تااه وكيل اهي كلمه بتنقال
واحد صادق تنطح لي وقال احنا شعب غشيم شو بعرفنا بالديمقراطية وسخام البين... وشو فيها لو الحكومة عدلت الدستور ولا طبقوا نظام ولاتعليمات ولا قوانين مؤقته بدل القانون ... شو فيها لو اولادنا ضيعوا عمرهم بعد التخرج عباب الديوان بالطابورزي مااحنا بنصف طوابير عالخبز والكاز والسكر ماهو ان راح ولا اجا بهالزمن المر صار الكل مقهوروبظل يقول الحال مستور.... وخليها بالقلب تجرج ولاتطلع وتفضح
شو يعنى انتخابات وقوانين واحزاب وتعددية؟؟؟ وشو يعنى حقوق انسان؟؟ ومالنا ومال رغيف الخبز بعد ماصار تفكيرنا بالبطن بدل الراس ... وشو يعني لما تعين الحكومة مستشار ولا مدير مكتب ابن لفلان وعلان ماهو الهدف خرجنا من عنق الزجاجه متخرج ابن امبارح باعلى الوظايف وبصير يناطح ؟؟؟ولا تطير فلان بدون سبب
شو يعني يعين وزير قرابته وببشع باللي عينهم من سبقه؟؟؟ شو يعني بتحدى وبصر على انه لازم يبقى فلان ولازم يروح فلان ؟؟؟؟ شو يعني لما تعين المعيد والعميد ,وتدعي للتجديد طب ما الناس صاروا بهالزمن اسياد وعبيد؟؟؟ شو يعني لما يرفعوا سعر البنزين وجرة الغاز والسمن والطحين بحسبه بس همه اللي بعرفوها .. شو يعني الاف عن العمل عاطلين شو يعني لما الكلمه تحتاج لرسوم وطوابع والصحفي عالمحاكم فايت طالع شو وشو يعنى لما تحبس صحافيين وهم فى الاصل بنظرهم شوية كدابين ؟؟
وشو يعني لما يحطوا راس الشعب با لطين؟؟ وشو يعني الحرية والديمقراطية والكرامه والثورة وحرب فلسطين ؟؟؟
وشو يعنى لما نندفن بالحيا واحنا عايشين وشو يعنى لما فى المطار اول كلمة تنقال الاردنيين صف على جنب ؟؟؟؟ والغريب بفوت وناس بتختم له الجواز وهو يشرب العصير وشناطيه بالسياره بتصير وشو يعني ولما بنوقف عباب السفارات ببلادنا من الصبح للمساء والجواب مثل ... بالصف واقفين مربوطين بكلمه من مراسلها واخيرا الجواب مافيش ماهو الواحد منا راح ولا اجا ابن ...... ؟؟؟؟ شو يعنى بلد بتتسرق ولا بتتحرق
وشو يعنى كام عمارة بتقع و كام الف مشروع فشل وشو يعنى لوكم واحد من هالشعب انتحرمن برج الاسكان ولا بناية الفانك ؟؟؟ شو يعني لوباعو ارض العبدلي والمطار وشو يعني لو الراتب بدقيقة طار وظل الديان عباب الدار ينطر طول النهار ؟؟ شو يعني لو البنك حجز عالدار وباع الاثاث والاحجار ؟؟؟
شو يعنى لما يبقى الظلم عدل والعدل ظلم .....
وقال بيقولو كيف المسئول ينام وعيونه بتغمض وبحلم وماعد محدودي الدخل ومعدومي الدخل واللى عايشين فوق فوق واللي عايشين فى الوحل واللى عايشين فى الترب واللي حمل شناطيه ومن الوضع هرب
,شو يعنى لما يبقى فية اطفال بالشوار ع بلفوا عالحاويات وعلى ابواب العمارات وبين السيارات وبلموا علب البيبسي وبشربوا اللي ظل فيها وبجطعجوها وبجموعها وبروحو يبيعوها ماهمه بيقبضوا شو يعني رسوم وطوابع بتتضاعف لانه الموظف بتقااسم مع المراسل الارباح والحكومة ماحطت ماكنه توخذ الحق وتعطي الحق ؟؟؟؟ شو يعني ضرايب اشي معروف واشي ماهو معروف؟؟؟ حتى ضريبه على ضريبه ... شو يعني لو راح الولد عالمدرسة بدون مصروف وصار يحسد زميله على باكيت الشبس ولما يقرب منه بقول له بس... شو يعني انفلونزا الخنازير والارانب والحمير شو يعني لو مرضوا لولادنا لو ماتوا لو ناموا بالشوارع بالحارات والحلو بسموه تسريب
وشو يعني يعنى لما يبقى عندنا كل كام شهر كام قتيل بالشارع ولا بالحي ???
شو يعني ضابط لما يضربك على رقبتك شو مش عارف لويش الرقبة خلقها الله ولا فكرك
علشان ياخد مقاس ايدية افهم يا بجم.....اعرف القصة و اوعى مهما يبهدلك ضابط ولا شرطي ولا يضربك تكون اهبل وترد علية
شو يعنى بلد بتنباع شو يعنى كل شىء ضاع وشو يعنى مستشفياتنا للفيران للحراذين للذبان للزباله ومقابرنا لفشة الغل والسكر والممارسات الخاطئة شو يعني لو غاصت السيارة ولا البنت والطفل بشي حفرة بالشارع وانكسرت اجرها ولاسيارة انكسرت على جبل بسموه مطب مثل مطب سلحوب و لو عجال السيارة اكلتها عين القط اللي بمواصفات مميزة لعيون من صنعها النا ولهالزمن المر
ولا وين بدك يودو هالزبالة بعد ماحرقوا الحاويه لانه ماحد شال مافيها من شهر والاسم بلديات وشو يعني لما اللى يموت منا يحطوة بمستشفياتنا تحت السريروبستنوا مين يدفع الفواتير... شو يعنى لما ناكل لحمة كلاب ولا بغال ولا حمير وبعد في ناس بتتكلم عن الضمير و لما نشرب مية مركبه من خلطه مجارى هو احنا كنا لاقيين شو يعنى لما يبقى اللى عندهم الكبد والسرطان ملايين المرض بايد رب العالمين وشو يعني لما الواحد منا ببيع الكبد والكلى بالف دولار ولا الفين ما هو فى الاخر عارف رايح لوين صدقوني بس انه احنا احسن من غيرنا بكثير
شو يعنى الجيب خاوى و معهوش حق بكيت الدخان هو يعنى احسن من مين شو يعنى لما يبقوا كلهم مديونين وشايلين الطين ما كل الاردنيين مديونين واللي مش مديون نايم بالسجن عشكات مش مدفوعه ولا على اموال البورصة اللي تدينها على امل
انتم مفكرين نفسكم وين بتقولوا عمارات وبيوت وكلهن مرهونين بتقولوا الزراعه مش جايبه همها وحالتهم كرب لعلمكم هاى هيه سياسية الارض وبيقولوا كمان فية ناس عاطلين طيب ما يشوفوا فية قديش موظفين اخذوا دور المساكين بواسطة نائب او دافعين و رافعين
عيب الناس انهم مش فاهمين
شو يعنى احتكار واشو يعنى لما الاسعار تغلى كل ساعة ولا كل نهار هاي اسعار عالمية
واحنا لسة فى اول المشوار..... اللى بيفهم من الناس صاروا يسموه حمار والصابر جمل والمسكين ارنب والحرامي فار شو يعنى خطه خمسية ورسوم جامعة وتوجيهي وثانوية ثانوية من الاساس تعليم التعليم للي نزل اسمه من الديوان ولا تحت اسم المكرمه ولو كان شبعان ابن شبعان العلم مش للفقير التعبان
سيبك من المعارضين وجرايد المستقلين طب ما الشعب بياكل ببلاش... شعب مقرف صحيح
قال شو بده والمعلمين ماعندهم ظل الا شوية الاعتصامات واضرابات والقايمين عليها بسوو مظاهرات شوية زعران ولا اولاد خارجين عن القوانين بدهم يعملوا فى البلد حالة غليان وشو يعني لما يبقى كام مليون حكم قضائي مش منفذ و لما النصب زاد وشو يعنى لما ينتشر الفساد بطول وعرض البلاد
شو يعنى لما يبقى الظلم عدل والعدل ظلم وقال بيقولوا كيف المسؤول ينام
الحكومة ياناس عندها حق
وعيب الناس انهم مش قادرين يفهموا الحكومة... والحكومة مش راضية تتطلع وراها وينحسب عليها رجوع للورا والمعارضة تقيد للحكومة شموع لان كل يوم فيه جديد وبحد ذاته عيد.... انابدي حد يقولى فية اكتر من هيك راحة وساعات كمان بيبقى كاتب عليها عضت اسد ولا نظرة حسد..... شفتوا الموضوع وصل لحد وين بس انتم مش فاهمين الحكومة وبتظلو تقروا وتكتبوا والحكومة مش فاضيه تقرا لكم وماعادت ابتقرا ورق بس من جوه قلبها عليكو احترق بكفي عاد يانمور من ورق



تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات