جراسا -

عمري 28 سنة، مشكلتي صعبة شوي وصعب يحسها غير اللي بيمر بحالة تشبه حالتي وهي حسب رأيي حالات منتشرة كثير بس ما حد بيحكي فيها
 

انا بحب البنات وبنفس الوقت بميل بالعاطفة للشباب، يعني بميل للجنسين بس من الناحية الجنسية بميل اكتر للبنات اما ميولي للشباب بيتجسد بعلاقة عاطفية (حب قوي) بعيدة كلياً عن الجنس وما بتتعدى الحب وتبادل القبلات في حال الشعور متبادل.

انا مريت بكذا تجربة فاشلة وكذا تجربة ناجحة بحياتي مع الجنسين. واستقريت من فترة الاربع سنين مع بنت وتعلقت فيها وعم حاول ابعد عن الحب للشباب، ومواعد نفسي اني اضبط اموري واسيطر على مشاعري وما خونها للبنت لأني كتير بحبها.

بس اللي حصل ان الموضوع كان عكس ارادتي، جمعتني الصدفة مع شاب، بالاول كانت الامور بعيدة كلياً عن مسألة العاطفة، كنا اصدقاء، بس الوضع اتطور وصرت احبه متل حبي لها.

حاولت كتير اتجاهل الموضوع لكن بدون نتيجة، حاولت ابعد عنه ما قدرت كمان، والمشكلة اني شعرت عنده نفس الشعور تجاهي، وهالأمر زاد المشكلة وعلقني بزيادة فيه، بس ما في اي مصارحة بيننا، عم نعامل بعض كأصدقاء وخصوصي اني كنت آخد قرار من بعد ما عرفتها لهالبنت اني ما اسمح لنفسي اجرحها بهالسلوك، بس ما عم اقدر كمل بوعدي خصوصي اني والشاب صارت صداقتنا قوية كتير.

فكرت خبره بحقيقة شعوري بس ترددت لأني ما بعرف كيف حيكون رد فعله خصوصي اذا طلع احساسي فيه غلط، رح تنكسر صداقتنا وماني محتمل خسارته، وحبيت كون صريح مع حبيبتي وخبرها بالحقيقة بس خايف انها تنجرح وتبعد واخسرها كمان.

انا بموقف صعب جدا وما عارف شو لازم سوي. وعاطفة الحب تجاهه عم تزيد كل يوم وشعوري بالذنب تجاهها عم يزيد اكتر. يعني باختصار حبيته وحبيتها ولازمني حل لهالمشكلة.... واملي !