شاطة اذا انك زلمة طيح من السيارة..
أعوذ بالله .. شو هالوقعة اللي وقعناها مع هيك (ولدنة) ) ..
كنت مضطرا لتوصيل شوية اغراض للدار ومن سؤ حظي اعترضتني مواكب تخريج..
ثلاثة مواكب على الاقل واكثر من 100 سيارة ..
كلها واقفة بنص الطريق ..
نزلوا الشباب والصبايا من السيارات اشي بدبك واشي بطخ واشي خذلك زوامير .. وانا انحشرت بالنص ..
وحياة من جمعني بيكو بدون ميعاد ساعتين ونص وانا محشور بالسيارة والشمس تصفق بوجهي صفق ..

الله أقردني وقلت شو قلة هالزوق هاي
وما بعرف من وين طلعت عليّ المسبّأت ..
لحد هون ممكن الواحد يتكافا الشر ويسكت لكن ان يحاول بعضهم ان سحبي من السيارة ليبهدلني امام الجميع فأمر لا يمكن احتماله .. واختصارا للشر
سّكرت باب السيارة والشبابيك على حالي ..
سمعت احدهم يقول اتركوه واذا فتح ثمه بكلمة ثانية اسحبوه من السيارة وارفشوا ببطنه ..

جلطني شاب حالق مارينز ويرتدي روب التخريج ..
اقترب مني وقال كنك زلمة افتح باب السيارة ..
شاطة أعملها وشوف شلون برفش ببطنك قدام كل الموجودين ..

أجاني العقل (الدنفريشي) .. قلت لحالي يا ولد بعد الكرامة ما ظل عمرأتحسّف عليه ..
اتصلت بثلاثة اربعة من شباب العشيرة وقلتلهم فزّعوا كل الشباب ترى انا بالمحل الفلاني وصار معي كيت وكيت ..
نص ساعة وانا اتصل وهم يتصلوا . آه وين صرتوا؟
قريب منك بس الطريق مسكرة ..
ما فاد غلطي غير الشحن خالص من التلفون ..
فتحت الشباك يادوب اثنين سانتي حتى يفوت عليّ شوية هوا وظليت استنى الفرج من عند ربي ..
الحمد لله بعد شي ساعتين زمان الجماعة الله هداهم ركبوا السيارات وقالوا يا ستين ..
بديت أشم ريحة كريهة جوا السيارة ..
ملعون ابو تميسهم على هالفقسة .. كل الاغراض على (الكبب) ..
ثلاثة كيلو لحمة و اربعه كيلو مخيض وضمتين بقدونس وراس خروف وبقية اغراض المنسف..
لكني بشكر ربي اني ما قللت عقلي ورديت على خريجنا المحترم لما قال لي شاطة كنك زلمة طيح من السيارة .. أكيد لو نزلت كان هسا انا بأحد المستشفيات مكسّر ومطبش .. وأكيد كرمال الجاهة الكريمة رايحين قرايبي يقولوا يا جماعة اللي اجيتوا بيه ابشروا بيه اشربوا قهوتكو والله محييكم من ملفاكو لملقاكو.