اغلاق

تقبرني ابن عمي




ليس كل الستات ستات .. وليس كل النسوان نسوان..
هذا ما قاله ( ستيني ) على وشك الاقتران (بفرفورة) من جيل بناته ..
فصاحبنا مقتنع أن الست الشامية معدّلة بكل (اشي) , بالطبخ وبالنفخ وبتدليل ابن عمها كمان .
ابن العم في القاموس الشامي هو الزوج .. ولذلك فالزوج الشامي حتى ولو كان ( فسفوسة ) او ( ماحيلتوش ) فتيلة ولا حصيرة فانه يعيش أجواء من الدلال قلما يحظي بها زوج آخر..
ليس القصد من كلامي ان ( أفقعّ ) الزوجات ( البلديات) أو أشجع الأزواج على الزواج بمثنى وثلاث ورباع .. ولكنها رسالة تحذير (خص نص) للمدام .. واقول لها : إياك ثم إياك ان تتجاوزي حدودك.. فالنسوان هذه الايام على قفا مين يشيل\

على فكرة أم العبد (ملعون أبو حريشها ) بلاء مصبّر:
عالطالعة وعالنازلة: شو بخزي هالبنطلون اللي لابسه ؟ .. ليش فايت بكندرتك على المطبخ ؟ ليش اللحمة اللي جبتها مدهنة ؟ .. ليش وليش وليش .. بصراحة قرّفتني عيشتي ..

شوفو الست الشامية :
من نص الليل , صباح الخير ابن عمي .. تؤبشني ابن عمي اجيبلك القهوة لعندك ابن عمي ؟ اعملك فطور ابن عمي ؟ تقبرني يا تاج راسي..

شوفو الست ( البلدية ) : لويش لهسّا نايم ..
الساعة صارت طنعش ونص وانت بعدك بتشخور\
قوم هات اللنا علبتين فول و خمس كماجات ( مقمرات) ..
ول عليك شو ( نايط ) انت مش عارف انه أمي وخواتي جايين يتغدوا اليوم عنّا.. قوم فز.. شو ( هاللاطة ) هاظ ..\\

بنفسي من يوم ما تجوزت اسمع من أم العبد كلمة تنعنش قلبي .. ما بسمع غير جيب وروح وهات .. \\
عند الست الشامية نص ذبيحة بتكفي الدار اسبوعين وعند أم العبد يا دوب تكفيها لطبخة وحدة ...
ملعون حريش الست الشامية شو طويلة بال ومشيتها زي الغزال ..واقل اشي برضيها
وأم العبد لو جبتلها كل السوق ما بترضى ..
كل همها تخليني مديون ومكسور الجناح حتى ما أتجوز عليها ..
آه منك يا ام العبد آه ..
اجا اليوم اللي اوقفك فيه عند حدك ..
والله والله .. لو تطلبي طلب مالوش لزوم .. ولا تلفّي إذنك هيك ولا هيك غير اجيبلك نعنوشة شامية عمرها 18 سنة
وساعتها اذا ما رجعت ابن عشرين بكون لويش أنا.
mkatishat@yahoo.com



تعليقات القراء

زوجة آدم
والله بتحكي صحيح ---الله يخليك اوعى الرجال يسمعوك حتى لا يتركوا زوجاتهم--بلا لف ودوران مش كل النساء مثل بعض ولا كل الشاميات مثل بعض
17-06-2013 08:26 PM
Mohammed Al-yazjin
لكن تذكر يا أستاذ محمود أن السورية ما تركت بيتها وهربت الا هروبها بروحها من لانها تعرضت لهجمة من الوحوش البشرية التي انتهكت اعراض حرائر سوريا وضبحت الشيوخ والاطفال ودمرت البلاد والعباد ...
حرائر سوريا يا أستاذ محمود قطيشات أمانه بشارب الغانمين أمثالك .
18-06-2013 12:04 AM
عبق
نفسي افهم مين الكزب هالكزبة وحكى هيك، حتى احنا الفلسطينيات والأردنيات بنحكي حكي احلى من حكي السوريات، وكل البنات بشكل عام شو ما كان جنسياتهم فيهم الهيك ووفيهم الهيك
رد بواسطة زوجة آددم
الصحيح ان كلام الكاتب فيه شيئ من الصحةلكننا لا نستطيع ان نعمم كما ان الزوجة بشكل عام من اي جنسية كانت اذا كان فيها خلق سيئ فقد يكون فيها خلق حسن وهناك حديث نبوي شريف بهذا الخصوص لا احفظه حرفيا
18-06-2013 11:05 AM
ارملة
اه كمك يا سيد قطيشات هلا شفت المدام مو قد المقام اه منكو يارجال شو قويين
بتظل الست الاردنية صبورة على بلاويكو بكفي انها بتحافظ على فلوسكو وما بتبعزقها مقال حلو كتير كتير وياريت مدامة الكاتب تقراه حتى نعرف ردةفعلها على بلااوي زوجها شكرا مرة تانية للكاتب ولجلراسا المتألق دائما
18-06-2013 07:49 PM
ابو الشكر
بعد ان قرأت المقال صدقوني غير اتجوز شامية واذا مرتي مو عاجبها لاطلقها بالثلاثة هذا الحكي اللي بعبي الراس
من شهرين ما سمعت من ام الشكر كلمة صباح الخير ما عدا امبارح لما قرات المقال
شكرا لجراسا على تميزها وتعريفنا بمقالات بتستاهل القراءة
رد بواسطة سليمة
هل رايت بعينك يا صاحب المقال مع احترامي لك--فطنت علينا الرجال كي يتزوجوا شاميات والله لا امزح اذا قلت اني لااحب ان يقرأ المقال زوجي
19-06-2013 09:45 AM
ميار
هدا الكلام صحيح اذا كان الزوج سوري كمان بس اهل البلد عنا اذا تزوجوا سورية راح تخليه على الحديدة وبدها كل شي من احسنه غير انه راح يتجوزها هي واهلها ويصير للبيت بيتهم وهدا الكلام مش جديد من يوم يومها السورية هيك بتحب تاخد الغريب عشان تدلل وينصرف عليها ببذخ واسألوا المجربين
19-06-2013 10:37 PM
نزيهة
كلام تعليق 6 صحيح تماما وياما خربت الشاميات بيوت ازواجهن مع فرضية عدم التعميم لكن الست الاردنية لازم تتلحلح شوي وتشعر مع ظروف زوجها
20-06-2013 09:43 AM
ام محمد
صديقاتي لما قرأوا المقال زعلو كتير من الكاتب لكن الصحيح ان المقال ما فيهوش اساءات للاردنيات بقدر ما هو مقال يتحدث عن الخوف من انتشار ظاهرة الزواج من سوريات نازحات باسغلال ظروفهن الحالية شكرا لجراسا المتألق دائما وبأقول للكاتب شو رأي المدام بالمقال
20-06-2013 09:47 AM
أحمد عبد الرحمن


نفسي اسمع رأي ام العبد فيك يا استاذ محمود قطيشات
20-06-2013 12:08 PM
فاديا
اعجبني المقال من ناحيتين اسلوبه الساخر ةلستخدام عبارات محلية بلهجة اردنية عامية ومع انني من انصار الفصحى الا ان العامية احيانا اكثر قدرة على توصيل الفكرة انا من المتابعين لمقالات الكاتب السياسية وهكذا عرفناه من خلالها ولكن الكتابة الساخرة هي فن صعب لا يتقنه اي شخص واقول للقائمين على جراسا اننا من المتابعين الدائمين لكم واقسم انكم موقع محترم جدا جدا ومثل هذه المقالات لها جمهورها نشكر الكاتب ونريد مقالة عكسية عن معاناة الاردنيات مع بعولهن الاشاوس اصحاب الشوارب والشباري
20-06-2013 04:26 PM
زوج مقهور
كل ما ذكرته كلام صحيح انا الان على 60 سنه الي متزوج 33 سنه كلها قهر وظلم حتى اني كفرت بكل شيء حتى الاديان جميعها وانا الان بضور على شاميه فرفوره حتى اكمل بقية حباتي
20-06-2013 09:10 PM
طوالبة
الستات الاردنية واختها الفلسطينية في الغالب مبدعات في النكد والدفاشه والانتقاد والتذمر
20-06-2013 11:49 PM
صديق
المعذرة استاذ محمود اذا علقت بالنيابة عنك على بعض التعليقات انا اعرف الكاتب عن قرب فهو شخصية هادئة جدا وبيتوتي جدا وعلى عكس كا في المقال وحياته الاسرية رائعة لكنه يكتب للاخرين من اجل توصيل الفكرة تحياتي لك يا ابو العبد ورجاء ما تخلي المدام اقرأ المقال احسن تحرد عند اهلها اسبوع زمان
21-06-2013 11:28 AM
نسونجي
اللهم احفظ كاتب المقال وجنبه شرور النسوان وابعد عنه ضررهن وحسدهن ولعناتهن مقال من الاخر مرتي لما قرأت المقال قالت آخ لو امسكه هذا الزلمة غير أقطعه بأسناني انفد بريشك يا قطيشات احسن تشويك المدام وتعمل منك كفتة وعرايس
21-06-2013 06:55 PM
وليد الحروب - بيت لحم - فلسطين
الأخ محمود قطيشات اسلوبه رائع في كتابة المقال وهو تحذير شديد اللهجة للنساء البلديات اكيد ميش كل السوريات مثل هالموديل المرغوب للرجال
21-06-2013 09:58 PM
سورية متجوزة من اردني
ابن عمي لما بفيق الصبح بلاقي القمر حده
مرته الاولانية سببت له تلات جلطات وعملية قلب مفتوح اسألوا جوزي كيف صارت صحته بعد ما تجوزني ابن عمي رجع شباب وما بستغني عني بنوب ابن عمي تاج راسي والله والله لو طلب مني لبن العصفور ما قلتله لا
21-06-2013 11:25 PM
اردنية وافتخر
الى تعليق رقم 16 ابن عمك اللي رجع شباب أهبل لانه لو كان بكامل قواه العقلية ما كان تجوزك ولا بتجوز غيرك وعنده كل هالامراض نصيحة لكل اردني بده راحة باله يطبق المثل من طين بلادك لط خدادك أنا قرات المقال اكثر من مرة فوجدته بوجه النصيحة لكل ست اردنية تدير بالها على بيتها وتراعي ظروف جوزها المالية ولم اجده يشجع على الزواج من الشاميات عاى العكس هو في داخله ضد هذا الزواج
رد بواسطة اردنية ثانية
وكم من صحيح مات من غير علة وكم من مريض عاش حينا من الدهر اما ان الزوج يطلق زوجته ويرتاح مع اخرى فهذا صحيح انما ليس بالضرورة ان تكون شامية
22-06-2013 10:21 AM
فارس الفرسان الى سورية متجوزه اردني
انا بدور على سوريه تحكيلي ابن عمي والله والله لو الاقي الي بتريح قلبي وبتريح بالي ليكون الك حلوان الي تطلبيه اخ بس اخ لو الاقي سوريه مثل مابدي
22-06-2013 01:56 PM
حمصية
تقبرني ابن عمي ياريتني جاكيت تلبسه باشتوية ياريتك تعدمني وتقبرني كمان اذا بتزعل مني .. ابن عمي انت نظر عيوني ودقات قلبي انت شمعة حياتي وشمسي وقمري ابن عمي روح انشا الله تموت اذا تجوزت غيري او حتى تفكر تتجوز علي شايف ابن عمي غلاوتك على قلبي
يسلملي هالموضوع شو فرّح قلبي والله والله بعد الست الشامية ما في ستات مو هيك يا سيد محمود قطيشات شكرا لجراسا على هيك مقالات بتجنن
22-06-2013 04:38 PM
مفلح
- هذا الكلام مخالف للواقع 00 فصدق المثل القائل (من طين بلادك خط على اخدادك)وكل من يلجأ الى هذا الكلام فهو خاسر لا محاله..لان بنت البلد تشعر معك وتشاركك في كل المناسبات الاجتماعية اما الاخريات فسيبعدنك عن رحمك...وتصبح غريبا بين اهلك..فكثير من الكلام المعسول...يجر الى الهاوية.
24-06-2013 07:52 AM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات