اثناء جلوسي امام البيت بيوم مشمس ساعة المغربيه ..كب واحد على راسي ( بيبسي كولا ) .. حددت المصدر واطلعت اتفاهم معاه .. لم ادرك حقيقة انو هذا الزلمه ( جهم ) ويفوقني قدره وطول وعضلت ثلاث اضعافي .. تفاجأت به .. وقلي مش بالعمدا .. كيف مش بالعمدا وهي اجت على راسي مسنتره .. كلمه منو وكلمه مني .. اتكامشنا ... وفزعولوا قرايبوا واصحابو .. اكلت قتله وروحت ..
ظلت المسأله جازه ببالي وقلت والله لانتقم منو لهالعره هاذ واعلموا درس ...
- الو مرحبا .
- هلا ابن عمي.
- كيفك ابن عمي
- بخير
- قاصدك بخدمه .
- اتفضل ...
- برضيك يا ابن عمي واحد يعتدي علي ..
- لا والله ما برضيني .
- طيب عاوزك تيجي لعندي بدي ( عزوه ) اتشد معي مع ابن هالحرام هاذ .. وشرحتلو القصه .
- ما انت عارف يا ابن عمي انا بالشغل هسه .. بداوم مسائي .. في مجال اتخليها لبكره المغرب.
- بكره بكون ميت .. الزلمه اتوعدني بالمزيد... على اية حال بتحضر عزاي .. بستفيدوا منك بصب القهوه .. اترحم علي .. سلام .

اتصال اخر ...........

- مرحبا ابن خالتي ..
- هلا والله .. وين الغيبه .
- موجود لهسه .. بدي اياك ( عزوه ) اتشد معي ..شرحنالو المشكله ..
- ما انت عارف يا ابن خالتي انا على ابواب زواج وشغال بتوزيع الكروت .. بتقدر اتأجلها يومين .. انا بحكي معك .
- عادي ... هذا اذا ظليت عايش .. مبروك سلف.

اتصال اخر ......
- مرحبا يا ختي .
- هلا يا خوي كيفك ..
- امنيح لهسه ..في مجال تبعثيلي ولادك يفزعولي .. وشرحنالها المشكله .
- ما انت عارف يا خوي .. ابني الكبير مع ابو بالشغل .. والصغير راح عند اختو يصلحلها مواسير المي .. استهدي بالله ... اذا كان ولا بد ببعثلك اياهم هاليومين يا خوي.
- فش داعي .. لوين بدك تبعثيهم .. يلا .. ابعثيهم على المقبره .. خليهم يقرأو الفاتحه عن روحي .. وتنسيش يا ختي تزرعولي شجره زيتون عند قبري .. انتي بتعرفي انا حبب الزيتون . ان كان اخضر ولا اسود.
- لا اتفول على حالك بس انت استهدي بالله .
- حاضر .
شو هالعزوه هاي ... الكل مشغول ومش فاضي ... خلص راح اواجه مصيري لوحدي .. يعني انا صاحب حق .. وبسبب ضعفي ضاع حقي .
شو الحل ؟
حشدلي جارنا جماعتو وعزوتو .. وبلشوا يستفزوني بطولة اللسان .. وطلعت عليهم .. محاولا التفاهم .. انو تفاهم ... الكل شارك على ما قسم الله ... علي بتجود فيه نفسهم .. الله يجزيهم الخير .. المهم انتهت المشكله على خير ...
• كسر بالفك السفلي .
• الفقره الرابعه من العمود الفقري اتحطمت .
• عجز جنسي .
• فتلان بالورك الايسر .
• تورم وأمساك بالجهه الخلفيه ناتجه عن ضرب شلاليت متكرر.
• اختلاف (دوزان ) وايقاع طبلة الاذن اليمنى .
• كسر بأصبع السبابه والبنصر وانعكاف بأصبع الخنصر .
• حصوه بالكلى .
• دوالي مزمن برجلي اليسرى.
• قصر نظر بشكل طولي .
• فقدان حاسة التذوق للمشروبات الغازيه وبالأخص ( البيبسي كولا ) .
• 6 قطب متوزعات بالشكل التالي .. ثنتين فوق الحاجب الايمن .. وثنتين تحت الحاجب الايسر .. وثنتين بنص الشوارب.
• فقدان للبنطلون بشكل جزئي .. وثلاث ازرار من القميص .. وفقدان للملابس (الداخ ...) بشكل كلي .
لما استوى عدسي وبطل مني فايده بأشي تركوني لوجه الله تعالى .. وفاءا ومحبه للجيره .. وتعاطفا مع الاسرى .. وتضامنا مع اللاجئين السورين ... وابتهاجا بعيد العمال العالمي .. واحياءا لغزوة البسوس .. واكراما لأكتشاف ( البنسلين ) ... جزاهم الله عني وعن عزوتي كل خير ...
روحت بعدها على ( المستشفى ) وانا حافي .
وبعد يومين تلقيت اتصالات من القرايب والاصحاب والعزوه ومن باب الفضول بدهم يعرفوا شو صار معي .. وكان جوابي الهم .. بخير .. الحمد لله .. انتهت المشكله .. اتفاهمنا .. ساعة شيطان .. غلبتكوا .. ازعجتكوا .. شايلكم لعوزه ... ما قصرتو .. مقدر ظروفكو .. عادي .. شكرا لاتصالكم والاطمئنان علي .
ودارت الايام .. وتلقيت اتصالات من قرايبي وعزوتي وحبايبي واصدقائي بأوقات متفاوته بطلبوا مني افزعلهم بمشاكل متعدده ... هذا الحكي كان زمان .. يوم ما كان عندي صحه وقدره على المواجهه .. كان الاعتذار سيد المشهد من طرفي.. مش لأشي بس لأنو هسه انا نص بني ادم .. واجهت مشكله لوحدي افقدتني نصف بني ادميتي .. وتعطلت نص اعضائي .. ومش قادر امارس حياتي بشكل عادي بعد الاعتداء السافر علي .. ومع هذا لم اجد منهم تقدير ظرفي وانما الاستياء والتقصير بالواجب .. ليش انتو وين كنتو لما كنت تحت الكفوف والشلاليت والبكسات والنغز بالعصا ؟ ..
خلي كل واحد يواجه مصيرو لوحدو .. وبالتالي سيسقط واحد واحد من اهلي وعزوتي ويصير معهم مثل ما صار معي .
انا لليوم بجلس قدام باب البيت بس عملت اضافات .. لابس خوذه .. حتى اي اشي ينزل من فوق تتلقاه الخوذه ويا دار ما دخلك شر ...وعممت فكرتي على كل قرايبي واصدقائي وحبايبي يعملوا زيي .. لانو ما حدا لحدا .

ملاحظه : انا خايف يصير مع ( اسرائيل ) زي ما صار معي .. يوم الجد والطوشه والمواجهه ما اتلاقي حدا يفزعلها من (العرب ).
العرب فش عندهم يما ارحميني .. هيني انا بقولكم .. اسألو المستشفى ولا تسألوا جاري .. بس هذا ليش ( شمطني ) بكس بركبتو تحت الصره.. مش عارف.
والسلام عليكم..