اثناء مروري بالمدينه الرياضيه بوسط العاصمه استوقفتني مجموعه من ( الاجانب ) بحكوا انجليزي بطلاقه .. وهذا الشيء ليس بمستغرب او انه اثار استهجاني .. بالعكس هؤلاء الاجانب كونهم يعيشون بدولتهم الاجنبيه فهو تحصيل حاصل ان يتكلموا لغه انجليزيه اشطر مني .. استنتاج توصلت اليه لوحدي بحكم خبرتي بالحياه ... ( بدي تبخيره ) .. انا شخصيا انجليزياتي على قدي ... يعني يا دوب يا دوب على (go ) و ( come ) و (ok ) و ( welcome ) و ( yes او no ) امناح .. بسلكوا معانا اشوي .. وهسه ادركت جيدا ليش الاستعمار دخل بلادنا ومكثوا طويلا .. لانو بصراحه لما احتلونا احنا العرب ما بنعرف كلمات انجليزي كثير واول ما شفناهم جايين لعنا بلشنا نحكي معهم انجليزي من هالموجود عنا وكثرنا من كلمة (welcome ) ففهمونا الاجانب المستعمرين على اساس انو احنا بنرحب فيهم وبدنا اياهم يضلوا عنا ... حرام هم بريئين .. الحق علينا .. لعدم فهمنا وقدرتنا على التكلم باللغه الانجليزيه ومش عارفين المعاني الصحيحه للغه لانجليزيه فالجماعه اتعاملوا معنا على هذا الاساس ..والاساس اللي فهموا انهم مرحب بهم ... ويا دوب لما صرنا نفهم اشوية لغه انجليزيه ومعانيها ادركنا حجم الخطأ اللي كنا واقعين فيه .. اعرفنا بعد مرور سنوات وسنوات انو احنا باقين انقولهم (welcome ) اي اهلا وسهلا .. وينكم يا جماعه من زمان كان اجيتو .. شرفتونا والله .. وقيس على هيك كلمات كثيره .. مثلا الاجنبي المستعمر كان يقول بدنا نوخذ بترولكم على السريع انقولو ( yes) .. اطلع من بلدكم انقولوا ( no ) .. والاجنبي يطاوعنا حرام .. الظلم ... الله ما برضى فيه ..
المهم استوقفوني هذول الاجانب وسألوني اشي بالانجليزي .. حاولت ان افهم عليهم وقلتلهم .. عفوا .. sory .. عرفوا اني مش فاهم عليهم ..فقاموا بسطو كلماتهم الى ادنى درجه ... يعني نزلوا الى مستوى الصف الاول الابتدائي وبعدين الى مستوى الكي جي 1 ومن ثم الى الكي جي 2 ومن ثم الى لغة الاشارات ...
افهمت عليهم انهم هذول الجماعه بدورو على صاله يلعبو فيها رياضه .. شو اسم الصاله ما عرفت .. شو بدهم يلعبو بهاي الصاله ما بعرف .. شو هواياتهم ما بعرف .. هم بدورو على ( حمام ) يروحو عليه حشرانيين برضو ما بعرف .. المهم افهمت منهم انهم بدورو على اشي مفقود داخل المدينه .. هو مخرج هو مدخل هو بني ادم هو اشي بتاكل هو حيوان ضايع منهم ما بعرف .. غلبوا معاي كثير .. ..المشكله كان هذا الحكي بالصيف والدنيا نار وفش غيري كنت ماشي بالشارع وسط المدينه الرياضيه .. وكل ما يحكوا معي كلمتين او يأشروا بأيديهم محاولين افهامي وتوضيح وتحديد الهدف اللي بسعوا اليه ما يلاقوا عندي نتيجه .. ويصيروا يلتفتوا حولينهم محاولين ايجاد شخص اخر يسألوه ما يلاقوا فيرجوعوا يشخصوا ابصارهم علي باستياء محاولين افهامي . وانا يا عمي .... لا من ثمي .. ولا من كمي .. شو بدهم بالظبط مش فاهم عليهم .. اقسم بالله ما اني فاهم عليهم .. اجيت اخجل من شخصي الكريم ومن جهلي ومن هبلي ما قدرت ( لبلادتي) بليد شو بدك تحكي .. ما هو أنا بصراحه بضيع وقتي على الحكي الفاضي بدل ما استغل وقتي واتعلم لغه انجليزيه ابدا .. هو بس لو يعتقوني لله جماعة ( المي ) وما أظلش طاله نازل على خزانات المي اتفقد المي كان لقيت وقت طويل اتعلم لغات حتى ممكن اتعلم لغه ( الأردكوش ) يا زلمه .. شايف ( الأردكوش ) كان اتعلمتها .. .. بس وقتي مهدور على اشياء يفترض هي اتكون متوفره سايره بشكل طبيعي بدون تدخل .. طبعا قيس على هيك اشياء كثيره يهدرها المواطن العربي على اشياء فاضيه يفترض انها اتكون ماشيه لحالها طبيعيا واداريا عبر انابيب وقنوات البيروقراطيه تظبطها ساعة الانتماء ..
طال واحد منهم خريطه .. وفرشها قدامي .. وقام يشرحي ويأشر بأصبعوا على مناطق معينه ويمشي بأصبعو على ممر او شارع موجود داخل الخريطه ويظل ماشي بأصبعوا وفجأة يرفع اصبعو ويرجعو على نقطه معينه على الخريطه مصدر صوت ( خبطه ) على الورقه .. وانا بطلع على الزلمه وعلى الخريطه .. يا الله .. يا رب كلها انجليزي بانجليزي ودواوير ومربعات واسهم واكواخ صغيره وشوارع .. شو هاذ ؟ .. اخذت منو الخريطه وقربتها على وجهي وعيني وقعدت اتفحصها وأتأملها وانظر اليها بأهتمام محاولا فك طلاسم هالخريطه .رتبت افكاري .. اولا هذي الخريطه بلا شك للاردن .. وثانيا هذه الطلاسم اللي جواتها عباره عن تفاصيل الاردن من بيوت وشوارع واماكن سياحيه وابصر شو .. وثالثا هذه الخريطه مكتوبه ومرسومه باللغه الانجليزيه ... وانا بفهمش انجليزي ... اذا استنتجت انو ما راح استفيد منها .. فلفت نظري كثرة الالوان والتنسيق الحلو والترتيب والدقه بهذه الخريطه وقعدت أتأملها واتفرج عليها وصرت اقلب بصفحاتها .. وفورا مسك ايدي الاجنبي واعادني الى الصفحه اللي بدور فيها على الاشي اللي بسألوني عنو.. - وكأن لسان حالو بقول ... يا أخي فكنا منك .. سيبنا منك .. يلعن الساعه اللي وقفناك فيها وسألناك .. انا ندمان ... كلنا ندمانين .. بس الظاهر اتورطنا معك ... لا تقلب بالخارطه يا أخي .. خلينا على الصفحه المقصوده .. لا تبعبشش بالخريطه .. ركز معنا يا أخي .. شو هالبلوه اللي الله بلانا فيها .. خلصنا يا رجل .. قرفتنا - .. وانا بصراحه شعرت بهذا الاشي لانو بدأ عليهم التذمر .. طيب شو اعمل ؟..
رجعت قلتلهم .. (yes) .. وبأيماءات من عيني وايدي وحركات راسي اللي ناتعو زي ( طبة الشرايط ) مشير لهم بأن يحاولا افهامي مره ثانيه وبتسلسل وبهدوء وبشكل مبسط على الاخر .. بذلوا جهدهم لتوصيل الفكره وبالاخير افهمت منهم انهم يعني بدورو على مخرج من المدينه الرياضيه .. يعني بدهم يروحو ... بدهم يطلعوا من المدينه .. هيك افهمت .. هذا ابسط احتمال افترضوا من عندي .. بصراحه قلت خليهم يروحو احسن .. سخسخوا الجماعه من الشمس وطارت لياقتهم ( اللي كانو بدهم يمارسو فيها رياضه معينه اللي ما عرفتها ) من وقفتهم بالشمس ومن جداهت بالهم معي .... وقمت اتذكر بعض الكلمات باللغه الانجليزيه .. وقلتلهم بالانجليزي طبعا ( بترجعوا من هون دوغري – come back- وبتمشوا 20 متر لقدام .. كلمة قدام ما عرفتها شو بدي اعمل .. عكست ظهري الهم وقلتلهم وبعدين _ come back – مره ثانيه دوغري .. وكل ما بدي استخدم مصطلح ( الى الامام / يعني مش رجوع ) اعكس ظهري عكس الاتجاه حتى تظبط كلمة come back- وتيجي بمكانها الصحيح .. فصارو يضحكوا الاجانب .. فهموا شو بقصد .. فقام واحد من الاجانب يقلدني .. يصير يمشي قدام وبعدين يلف ظهروا ويرجع رجوع .. شو بعرفني .. كنو قام يتهبل علي وانا مش داري ... وانا بهز براسي ايوه .. ok - yes - ..
يا أخي وين اللوحات الارشاديه داخل المدينه الرياضيه .. مية صاله ومية شارع وممر ومية مبنى ومية مدخل ومية مخرج ومية دورة مياه .. طيب لو كان في لوحات ارشاديه بالعربي وبالانجليزي اتحدد خريطه المدينه وبشكل مبسط لكل الناس كان ما وقعت بهالمطب واعطيت فكره عن شباب وشعب الاردن اغلبيتهم طبعا انو احنا سلامتك واتعيش باللغه الانجليزيه ..
يعني الواحد منا ساتر حالو ستيره من ناحية اللغه الانجليزيه .. عارفين بعض احنا وعارفين انو في ضعف عنا باللغه الانجليزيه بس الشغله بينا ... مستوره .. فش داعي نفضح حالنا قدام الاجانب بمثل هيك مواقف .. ويا خوفي في مسؤولين كبار او ممن هم بمناصب اداريه وغير اداريه بعرفش يجمع كلمتين على بعضهم باللغه الانجليزيه .. وصدفت معي .. كنت اشتغل بأحد المواقع او الامكنه واجا وفد على مديرنا هذا الحكي قبل 15 سنه تقريبا وصار المدير يدور على احد العاملين بعرف انجليزي .. والادهى والامر الموظفين رشحوني انا .. وبسرعه رفع مدير مكتبو تلفون علي وقلي تعال بسرعه يا (برهان ) بدو اياك المدير .. قمت زي الزنبرك .. الخوف بقطع الركب .. وطلعت بسرعه .. واول ما دخلت عليه قلي كيف انجليزياتك ؟ .. قلتلوا .. يعني بمشي حالي .. ما انا بهذي اللحظه بصراحه لقيتها فرصه اظهر حالي وانفش قدام المدير ويمكن هيك بالمستقبل يظبطني ويدير بالو علي .. خلص هيو عرفني ولازم استغل الفرصه ... قلي ماشي .. في وفد اجنبي وبدي اياك اترجملي شو بحكو وخليك جنبي .. قلتلو حاضر .. دخل الوفد الاجنبي هذا الحكي زمان .. وبلشو يحكوا وانا على قدر فهمي منهم اترجم للمدير .. وكانو ايامها يحكوا هيك اللي افهمتو عن مشاريع فيها تخطيط وابصر شو ودعم وبدهم يوخذو فكره او زي استبيان عن الوضع بشكل عام حتى يرسمو خططهم ويعملوا دراسه .. وانا نازل اترجم للمدير .. والمدير يحكي بالعربي زيي وانا اقوم واترجم للاجانب .. بعرفش شو صار .. وانتهى الاجتماع وسلمنا على بعض وانزلت على مكتبي ... وفش ثلاث ايام الا مديرنا احالو على التقاعد او استقال او انسجن ما بعرف ... والظاهر والعلم عند الله اني خبصت بالترجمه ونقلت صوره غلط عن شو اللي بدو اياه المدير والعكس صحيح وضيعت على الشركه او المؤسسه مشاريع ومبالغ مهمه وذات قيمه من ترجمتي الغلط بالغلط .. اللهم اغفر لي زلتي .. وانما الاعمال بالنيات .. وهاي فرصه اطلب من مديري السابق بعرفش وينو هسه انو يسامحني .
انا ما اللي خص .. ليش يناديني ؟ .. ليش يستعين في باللغه الانجليزيه وهو يعلم علم اليقين انو انا بتقن اللغه الصينيه مش الانجليزيه بالاضافه الى اللغه العربيه .. الحق على اللي رشحني انا لهذه المهمه ..
على اية حال انا بلقيها فرصه لاعرض خدماتي على عامة الناس واي مؤسسه دائره اي جهه اذا بدكم مترجم لغه انجليزيه انا موجود .. حاضر .. انا بترجم وبس .. ما اللي بالنتائج .. وبحاسبكم على القطعه او القعده .. وبعملكم خصم اذا استمرت الترجمه اكثر من 10 دقائق .