كنت مره قاعد بين جماعه اناقش وانظر واسولف معتد بنفسي ابدا اتقول ابو العريف .. كل موضوع اللي رأي في .. حتى لو ما بعرف فيه اشي اخترع اي اشي يتعلق بهذا الموضوع وحدا قاري ورق المهم لازم احط لمساتي بكل موضوع ينطرح .. وعند انتهاء الجلسه /القعده /الجمعه / وروحت الناس قمت اتوضا .. اطلعت عللى المراي يا حفيظ السلامه لقيت على وجهي ( شحبار ) اسود من الذان اليمنى الى نص منخاري .. الله اكبر .. يا جماعه طيب واحد من القاعدين من اهل البيت ينبهني ايقولي امسح اللي على وجهك .. ابدا .. وتاركيني انظر (واشيوح ) بأيدي واسولف قدام الجماعه وعلى وجهي شحبار مثل المهرج ولا الكركوز .. مش لهالدرجه .
شو فيها لو واحد قلي بثواني والله يا برهان يا ابو الشباب يا معلم يا خنجعه يا تافه امسح للي على وجهك .. وجهك عليه شحبار .. شو فيها شو صار يعني .. بالعكس راح اشكرو .. اما هيك تاركيني زي الهبيله مش عارف .. ولا هم مستأنسين وهم شايفين الشحبار على وجهي .. هو منين اجاني الشحبار .. عليم الله وانا بصلح مناخل البيت يمكن لزق او ضرب وجهي بواحد من هالمناخل وطبع على وجهي وانا مش منتبه لأني بصراحه وانا بشتغل طبل حدا على الباب غسلت ايدي بسرعه وفتحت الباب أجاني ضيوف وجلست معهم وما قمت من محلي الا لما روحو ...
الادهى والأمر يوم كان ( سحاب بنطلوني ) نازل .. فاتح .. مش مسكر ... ورايح جاي .. رايح جاي قدام العالم بحفلة خطبه لواحد قرايبنا .. رايح جاي .. وخاصة بهيك مناسبات بكون في نسوان وبنات كثير غير الرجال والشباب .. وانا رايح جاي بينهم اهني وابارك واسلم وقصه من هون وحديث من هون والمصيبه انو بأوقات كثيره كنت بضحك على كلمه من هون او هون ... انو واحد أبن حلال ... بنت حلال .. اتقولي يا استاذ يا برهان يا ابن عمي يا ابن خالتي يا جاري يا جوزي يا يابا سحاب بنطلونك فاتح سكرو .. ابدا .. اغلقوا طيب .. ابدا .. استر عورتك .. ابدا ... استحي على دمك .. ابدا .. اخجل انت بمنطقة عرس نأسف لأزعاجكم برضو ابدا .. تركوني من اول الخطبه ( الحفله ) لأخرها هايم على وجهي زي الهبيله وسحابي مفتوح .. وبقول ليش الناس كانت تتجنب تتطلع بوجهي وتتطلع تحت .. والله فكرت الشغله ادب واحترام وخجل مني . وكنت اقدر هذا الأشي ... وبصراحه كانو يتغامزو ويتلامزو ويطلعوا علي البنات ويضحكوا ويصير وجهم احمر .. وانا مش داري شو السبب .. واقول بيني وبين نفسي شو مالهم هذول .. على ايش بتغامزو وبتلامزو .. انسى ... ورايح عن بالي انو سحاب بنطلوني ( الله يقطعوا من بنطلون ) انو مفتوح وعليم الله كان امبين اشي . معقول كان امبين اشي ؟ .. لا مستحيل .. معقول .. لا . لا .. انا اتفقدت حالي كنت محصن حالي ( ببكيني ) قطني شفاف شغل برا .
انتهت الحفله وروحنا على البيت وما قعدنا اشوي الا ( عيلتي ) بتقولي سحاب بنطلونك كنو فاتح .. اطلعت عليه ابن الحرام طلع فاتح .. وهسه حضرتك افطتني يعني اتنبهيني .. قالتلي وانا شو بعرفني هسه والله هيك انتبهت عليك لما قعدت .. وانا بقول يا ربي شو قصة العالم والناس .. هسه انحل لغز كل اشي .. لغز التلامز والتنابز والخجل والضحك ... اتفسرت حركات وافعال واقوال الناس معي .. باقي سحاب بنطلوني فاتح .. اشي بخزي .. والله يومها اخجلت من حالي .. وقعدت احسبها فلان شافني او انتبه علي الله يستر .. فلانه شافتني او انتبهت علي . الله يستر .. شو هالاحراج هاذ ..
بعرفش ليش الناس بهذي المسائل بتتجنب اتقول للواحد سكر سحابك .. امسح اللي على وجهك ( شحبار /كريمه /لبن / حبر قلم / وسخ /شحمه /زيت / زباله ) ما بعرف ...
الادهى والأمر انعزمنا مره ثانيه بس هاي المره على حفلة عرس .. وبتعرفو بالعرس الكبير والصغير من النساء (بتمكيجو ) وكون انا من اصحاب العرس ما بكون في حرج الواحد يسلم على قرايبوا من النساء والرجال ... وخاصة العمات والخالات ومن اللي هو .. وكلو على بوس .. كيفك يا خالتي وكيفك يا عمتي وكيف ولادك على ( مجق وبوس ) وهات يا ( طبع حومرا ) على وجه الواحد .. الوحده بتكون بالعرس مليطه حالها اتليط اتقول شحمه .. وبعد ما تنتهي حفلة السلامات بتروح تقعد عند الرجال ووجهك كلو ( طبع حومرا /احمر اخضر /اصفر/ نيلي ) وانا بكونش منتبه شو اللي على وجهي .. والزلام بطلعوا علي وبضحكوا او بطنشوا .. وانا بظل الله وكيلكم من اول العرس الى اخر العرس ( امكيج عفويا وقصريا ) وانا مش داري عن حالي .. وبوقع بنفس مطب ( سحاب البنطلون ) انو يجي ابن حلال .. بنت حلال .. ايقولي يا زلمه امسح اللي على صباحك .. وجهك مليان ( حومرا ) ابدا .. وبروح ... وبطلع بالتكسي . وبنزل عند الفرن اجيب خبز .. وعند الدكنجي اشتري للولاد شيبس وعلكه وانا وجهي مطبع حومرا .. اي في ناس كثير كانت تقترب مني وتودني بدون سبب ..( يمكن فهموني غلط ) مع انو ( عيلتي ) ماشيه معي ما بتقولي .. وانا مش معقول وين ما اروح احمل ( مراي معي ) شو بعرفني .. حتى (عيلتي ) هددتها مره انو لازم اتقولي شو بكون على وجهي .. شو اللي بمنعك اتقوليلي .. ايكون ردها . انشا الله .
كثير اراجع دوائر ومؤسسات ومربعات واثناء عملي ايضا الاحظ انو في اوقات كثيره تمشي معاملتي خاصة عند النساء بسرعه .. واكتشف السبب فيما بعد انو ( سحاب بنطلوني ) كان فاتح ومنعا وتجنبا للاحراج يخلصولي معاملتي بسرعه .. واذا في هيك موضوع نقاش او استفسار عن شغله تتحجج الفتاه او البنت بأي اشي حتى تخلص مني وانا سحابي مفتوح .. لأنو بصراحه مش منظر .. محرج اللي والها ولكثير من الناس .. ويلا السلامه لما انتبه لهالحكي هاذ.
في ناس بفكروا هاي الشغله متعمده خاصة من طرف النساء .. وبوخذو فكره غلط عن الواحد مع انو ما بكون قاصد الواحد وما بعرف ... ويبقى الطرف الاخر يعاملك بحذر وخاصة النساء حتى يتأكد لهم من اخلاقك وان الشغله مش مقصوده .. وبالأخص بما يتعلق بسحاب البنطلون .
انا شخصيا صادفني واحد زميلي سحابو بنطلونو مفتوح ... وبدون اشي يعني .. قلتلو هيك بصوت واطي ( سحاب بنطلونك مفتوح ) سكرو .. كنك مش منتبه .. وفجأه حتى يخرج من احراجو من قدام الناس لأنو عرف انو الناس باقيه شايفيتو وهو مش داري صرخ بضحكه عاليه وقال .. هيه .. هيه .. شوفو يا جماعة وين باقي يطلع .. هذا نظرو واطي .. وصار يضحك .. وقام سكرو وهو يضحك وغير موضوع السحاب .. ووضعني بخانة اليك واحرجني .. هذا جزائي .. قلبت الشغله علي .. بسيطه .. على يد الله ويدك يا رجل ما عاد انبه حدا لا لسحاب بنطلونو ولا لشحبار بصباحو ولا اي اشي .. اي حتى لو ناسي تلبس بنطلونك ما راح اقولك .. فوق حقو دقو ... انسى .
انا ثلاث ارباع اللي بتعامل معهم سحاب بنطلوناتهم مفتوحه .. ومش راح اقولهم خليهم لما ينتبهوا لحالهم انا مش ناقص ردات فعل غير متوقعه .. .. كل واحد يدير بالو على سحاب بنطلون لحالو لبالو .. انا ما اللي خص .. والله حلوه اترك شغلي ومسؤلياتي واقعد اقول للواحد انت سكر سحاب بنطلونك وانتي ( دبوس إشارك واقع ) .. انسى ...
كثير من الاشياء بقع فيها الانسان وهو مش منتبه ... امثله ..
1- واحد بكتب على ( الكيبورد ) عربي وبعد مضي كتابه 10 الى 15 دقيقه بكتشف انو باقي يكتب انجليزي .. ناسي يقلب الكيبورد من لغه الى لغه .. بصير يلعن .
2- واحد بولع سيجاره وبكتشف او حدا بقولو يا زلمه سيجارتك هيها بالمكته وليش ولعت الثانيه .. بقولو بتعرف اني مضيع .
3- واحد بولع سيجارتو بالشقلوب من جهه الفلتر وهو مسترسل بالحكي ومش منتبه وبكون في تلك اللحظه بشكي من رداءة الدخان حتى ينتبه هو لما يبلش ( يتفتف ) من التبغ اللي اتفتفت بثمو .. او واحد ينبهو .
4- واحد بكتشف ( من الحمام الى الحمام ) انو باقي لابس اواعي الداخليه بالشقلوب او احد بلايزو .
5- واحد ماخذ خلوي صاحبو او اخو وهو طالع مستعجل من البيت او الشغل وما بنتبه الا لما يسمع صوت رنة ( زقزقة العصافير ) مش رنتو .. هو رنتو ( سيبوني اعيش ) لحمورابي.
6- واحد بكتشف انو ماخذ معاملة واحد ثاني بأي دائره ثانيه وطالعه معاه مع معاملتو باقي الاخ يغرف غرف كل المعاملات اللي تحت معاملتو لما يخلص ختمها او توقيعها .. صارت معي لما انهيت كتابه وتوثيق عقد زواجي اكتشفت طالع معي عقد زواج ثاني بالغلط .. قارنت بينهم فكرت ابدل لقيت عقد زواجي المؤخر خمسة الاف دينار وهذاك العقد المؤخر الف دينار قلت انسى خليني على عقدي الاغلى .. ورجعتو .. زعل مني الخاطب . ليش ما بعرف.. معقول كان بدو يخلص.
7- واحد بوكل ملوخيه او زعتر وكل اسنانو امطبعه ومزكرشه اخضر وبسولف وبحكي عن اهمية استخدام معجون الاسنان ولما يروح ويطلع على المراي بحلف يمين بعدها انو ما يحط بثمو ولا يوكل ( بصل اخضر وكزبره ) .
8- واحد بصحا من النوم يوم عطله ومن كثر ما هو مسطل بفكر اليوم يوم دوام وبقوم مثل المفزوع اركاض على اواعيه والحمام وبعض دقائق بسيطه وبشوف البيت هادي والكل نايم ..بسأل حالو شو هو اليوم .. لما يتذكر انو عطله برجع يلقط خبيزه.
اشياء كثيره بتخلي الواحد امضيع او ينسى او ينشغل او ما ينتبه لأبسط الاشياء ... وبكون بحاجه الى واحد ينبهو الها .. بس هيهات .. مشاغل الحياه كثيره .. اي الواحد نسي اسمو .
ملاحظه : تجنبا للاحراج ومن الوقوع بفخ ( سحاب البنطلون ) انو يفتح لا اراديا .. انا من يومها قررت اتخلى عن بنطلوني .. وهيني داير بالشارع من حاره لحاره ومن عرس لعرس ومن مكان لمكان بالبكيني .. اختصرت على حالي وعلى غيري الطريق .. بس مشكلتي من وقت لوقت بعاني من لفحة هوا .
والسلام عليكم
Burhan_jazi@yahoo.com