انهت صفارة الحكم مباره كانت مولعه بينا احنا حارة ( التحتانيه ) هيك كانو يسمونا وبين حاره تسمى الحاره ( الفوقانيه ) هيك كنا انسميهم .. ما ظل قدامنا منطقبا الا الى ضربات الجزاء فلجأنا اليها هيك علم ( الطجطجه ) بقول .. كان يومها عمري ما بتجاوز ال 13 سنه .. عدينا 11 خطوه عن (الجول ) وحطينا كومة تراب ابيض كعلامه لانطلاق الفطبل باتجاه المرمى .. وصف ممل .. المهم .. انا اول واحد بدي اشوت هالفطبل كضربة جزاء .. يا ساتر .. ارجعت ثلاث خطوات لورا وعاينت الجول وخلص قررت اشوط واسدد ( قويه هاي ) اسدد .. كيف طلعت معي مش عارف .. باتجاه الزاويه اليسرى .. اخبط ... مثل الصاروخ انطلق الفطبل فوق العارضه .. لا يمنى ولا يسرى ولا حتى بالوسط .. اكلت قتل اكلت شلاليت اكلت بكسات لما اندورت دور .. دوخت .. يا الله شو ذنبي .. اي بيليه اشطر واحد بالعالم بكرة القدم ضيع ضربة جزاء وفريقه غفر له ذنبه اما انا ليش هيك حظي ليش ما قدرو موقفي .. انا صغير . ...
اجا لاعبهم وشاط ضربة جزاء جاب جول .. رجع فريقي ونزلو في طس كمان مره .. انعميت .. فوكحت .. انفلجت من الضرب .. قعدت اسبوعين بعدها اكل شوربا .. انلوق حنكي من الضرب .. بلعن الساعه اللي ضربت فيها ضربت هالجزاء هاي المشؤومه .. فعلا اخذت جزائي بشكل محترم ولائق ..
اجا لعيبنا حط هالفطبل وبدو يضرب ضرب جزاء الثانيه .. اخبط .. ضربت بالعارضه وطلعت برا .. انا نطيت من الفرحه مع انو من فريقي وهذا الحكي مش لمصلحتنا بس قلت يلا بخفف عني ضرب وبصير اللي حجه .. لكني اتفاجأت بسبب صرختي من الفرحه وبشكل عفوي انو فريقي التفت نظرو علي ورجعو يضربو في فكروني عميل .. وهات يا ضرب .. طيب واللي ضيع ضربة الجزاء ليش ما تضربوا يا جماعه ما انا وياه بالهوا سوا .. قالولي مش شغلك .. افتكوا مني ومن ضربي وراح بلشوا بالزلمه هذاك وهات يا ضرب .. كنت حابب اشاركهم من باب اسد اشي من اللي ضربني اياه بس ما قدرت عظامي متكسره ووجهي متورم ومش قادر امشي .. انهو اللازم معاه وصف جنبي وعاملونا كأنذال في هذيك اللحظه .
اجا الفريق الثاني .. نفذ ضربة الجزاء الثانيه وجاب جول .. وبعدين مع هالشغله .. رجع فريقنا يضرب فينا الاثنين من جديد ..
نفذنا ضربات الجزاء الباقيات وجبنا فيهم جوال .. والفريق الثاني نفذ ضربات جزاءه كامله وجاب 5 اهداف واحنا جبنا بس 3 .
اخسرنا المباره .. يا باي شو اكلت قتل .. لليوم بعاني من كسر فك .. وتشريت بالمخ من هذيك المباره .. اما صاحبي الثاني الشريك معي بجريمه تضيع ضربة الجزاء ... (12) سنه زواج لم ينجب اطفال .. الله اعلم وين باقين ضاربينو .. معقول ضيعوا الزلمه هيك بهوايه طايشه .
بالسياسه .. احيانا كثيره تصل الامور الى نهايتها .. لا غالب ولا مغلوب ... وتبقى الامور معلقه .. وهات يا وقت .. طيب احنا لو فرضنا .. معلش خذوني على قد عقلي .. يعني .. مثلا اذا دولتين او فئتين اختلفوا على موضوع سياسي اقتصادي اجتماعي مثلا .. ووصلوا الى طريق مغلق ..ليش ما يلجأوا الى ضربات الجزاء وتحت اشراف الامم المتحده وبحضور ( فيفا ) والفطبل يا سيدي بنفخو ( بان كي مون ) ما راح نختلف عليها ... مثلا ( ايران ) بدها غصب عن اميركا تعمل نووي .. واميركا بدهاش ايران تعمل نووي .. وصرلهم خمسين سنه على خذني اجيتك والمسأله معلقه .. يا أخي انا بدي احلها .. تعالو انتو الاثنين العبوا (ضربات جزاء ) خمسه بخمسه .. اللي بفوز خلص بمشي كلاموا ...
هسه المبادرات رايحه جايه .. رايحه جايه .. على مستوى العالم ... ولا مبادره من المبادرات لحل خلاف الله وكيلكم مشيت .. ابدا .. يا اخي اعتبروا ( ضربات الجزاء ) نوع من انواع المبادرات .. احنا بنحكي على مستوى فطبل .
انا استنتجت ان هناك فعلا وفعليا في ضربات جزاء تنفذ لحل الخلاف بين الدول .. لكن للأسف ضربات الجزاء تستخدم فيها ( الصواريخ ) خمسه بخمسه .. اللي بدمر وبقتل اكثر هو الفايز ... مع انو ثلاث ارباع ضربات الجزاء بتطلع اوت .. بتيجي على روس الناس المدنيين الابرياء .. او بتضرب بالعارضه بتهدملها منشأه حيويه .. يا اخي قدامك الهدف صوب عليه بس انا مش عارف اعذرهم ولا لا .. اذا انا ضيعت ضربة جزاء على مستوى فطبل .. كيف جيوش ودول ؟ ... والله يمكن هيك علم ( البلطجه ) بقول .
الزوج والزوجه اذا اختلفوا على موضوع معين او معلم وطالب او شوفير تكسي او باص مع راكب او اي اختلاف حصري او غير حصري .. شو الي بمنع المختلفين انهم فورا يجيبوا هالفطبل ويعملولهم ( جول ) ويعدوا 11 خطوه وينفذوا ضربات الجزاء .. ويا دار ما دخلك شر .
المشكله انو اللي بضيع ضربة جزاء سخط ربنا راح ينزل عليه من جماعتو .. احسن .. خليهم يدقوا ببعض ...
هذي الطريقه بتوفر اشياء كثيره على اقلها خذني اجيتك .
مثلا بمصر لو لجأو الى ضربات الجزاء كان مشكلتهم انحلت زمان .. خاصة ( البرادعي ) عندو لياقه عاليه بشرب ( البراندي ) بشوف الجول مزغوله .. ولا راح يجيب اي هدف ... وهذا الحكي مش بمصلحتو .
شفتو عاد .. في مزايا وفي ديناميكيه باللعب .. وفي استغلال ظروف ...
لو طبقت مبادرتي هاي راح تنحل ثلاث ارباع مشاكل العالم والكل بستفيد على الاقل من ناحية ( اللياقه البدنيه ) .. شو رأيكم بهذي الفكره .. طبقوها .. وجربوها .. وحللوها .. وعميموها ..
ملاحظه : بصراحه انا تعبت من مشاهدة الاخبار .. مليت .. انفرا فلبي .. مشاكل العالم مأزمه .. لا يوجد حلول او حل لشيء .. من اسوأ لاسوأ .. من مشكله لمشكله .... العبوا ضربات جزاء وخلصونا .. وخلي الحكم يصفر وينهي المباره .. بدو يروح وانا بدي اروح .. والكل بدو يروح وينام .
ازهقنا.
والسلام عليكم
Burhan_jazi@yahoo.com